Sawrkar laipui Ministry of Tourism hnuaia Swadesh Darshan 2.0 Scheme kaltlanga Champhai district-a tourism kawnga hmalak dan tur sawihoin Nilaini khan Champhaiah thutkhawm a ni.
Swadesh Darshan 2.0 Scheme kaltlang hian Mizoramah Aizawl leh Champhai chu tourism kawnga hmalakna atan thlan niin, he project kalpui chhung hian Champhai district-ah cheng nuai 9000 hmanga hma lak tum a ni a. Tlangsam, Zotlang, Keilungliah, Vangchhia, Farkawn leh Dungtlang ah inruahman a ni.
Thutkhawm kaihruaitu Champhai district bawrhsap James Lalrinchhana chuan an district chu pipute sulhnu hmun, khualzin hip thei tur hmun pawimawh leh mawi tam tak awmna a ni, tiin, heng thatna leh theihna awm hai chhuaka hmang tangkai turin Swadesh Darshan 2.0 Scheme hi tha taka kalpui a nih a beisei tih a sawi. He scheme kaltlang hian Champhai district-ah eizawnna thar tam tak a awm theih tur thu sawiin, “He project liantham tak tih hlawhtlin a nih theihnan sawrkar, NGO, khawtlang hruaitute leh district mipui kan lo inpuahchah lawk a tul a ni,” a ti.
Tourism deputy secretary Zonunthari chuan tourism hmalakna hrang hrang leh Swadesh Darshan thiltum leh kalpui dan tur a sawifiah a. Tourism deputy director Dr R Lalrinchhani leh EGIS project manager Vaibhav Bhatnagar ten powerpoint hmangin hriat tur tul an sawifiah a. Project kalpui dan tur sawiho niin, zawhnate chhan a ni.
Thutkhawmah hian a kaihhnawih sawrkar department aiawhte, tlawmngai pawl aiawh leh khualzin thlenna hmun enkawltute an tel a ni.
Tourism lama Champhai district-a hmalakna thar tur ruahman thlir ho
