State dangin an economy chawikangtu atana tourism an hman tawh laiin, keini state hi chuan ‘economy chawikangtu’ atan tourism hi kan la hmang pha lo hle niin a lang. Tun hnaia RTI Act hmanga zawhna chhanna han belh chian hian, Mizoram tourism thawhchhuah a tam tham loh tehlul nen, record a buar chuar hle niin a lang.
Kumin kum tir lam khan tourism minister hovin kum thum kalta chhunga tourism hmalakna thlirletna hun hman a ni a. Khami tum khan, kum 2019-2020 chhunga State GDP-a tourism contribute chu 3.81% a tling nia tarlan a ni. Hemi chungchang hi RTI hmanga zawh niin tourism lam chuan Mizoram GSDP-a tourism contribution 3.81% hi Rs 3,05,69,379 a ni, tiin a chhang a.
Kan GSDP hi record-a kan hmuh dan chuan kum 2019-20 khan Rs 26,502.56 crore tih a ni a. Heta 3.81% hi Mizoram tourism-in a contribute ve a nih chuan cheng nuai 305.69 lek hi chu a ni thei lo hrim hrim a; a lo berah 3.81% hi cheng tluklehdingawn 10 tal a nih a ngai. Chuti a nih chuan, 3.81% hi engtia chhut chhuah nge ni ta ang tih hi zawhna a ni ta a ni.
Tourism revenue hmuh hi Mizoram district hrang hranga tourist lodge, highway restaurant leh wayside restaurant 64 atanga tlingkhawm a ni a. Tourism department hnuaiah hian tourist lodge leh a behbawm ho hi 71 a awm a, chung zinga 31 chu outsource a ni. Heng outsource 31 zinga 9 hian kum thum chhungin revenue an chhunglut lo a. Tourism-in sum a hmuhna awm chhunah pawh, hetiang vel hi kan dinhmun a ni.
Heng sum hmuhnate hi a tam tham loh tehlul nen, thahnem kan la ngai lo lehzel em maw ni, kum thum chhunga Rs 500 te, 1500, 2000, 2500 tih vel revenue hmuhnate hi chu a ni lo lulai deuh chu a ni. Chutih laiin Outsource ni si lo, tlawhtu ngah ve viau thin nia lang |amdil Picnic Spot-in kum thum chhunga Rs 14,642 lek a thawk chhuak te hi, chawhrualin thla khatah cheng zali vel a thawkchhuak tihna a ni; hengte hi enfiah a ngai niin a lang. Tourism lamin tan an lak thar a ngai a ni e.
Tourism thawhchhuah
