Tourism minister Lalnghinglova Hmar chuan, homestay chu tourist lodge sak aiin sawrkarin a ngai pawimawh zawk dawn tih a sawi.He thu hi nimina Vangchhia khuaa Kawtchhuah Ropui, Zofate Thlangtlak Gate-a PRASHAD (Pilgrimage Rejuvenation & Spiritual Augmentation Drive) hnuaia project kal mek – Cultural & Heritage Centre hmunhma a tlawhnaah minister hian a sawi a. “Sawrkar tum danah chuan tourist lodge sak rup ai chuan homestay siam a tum zawk,” tiin a sawi a ni.
Minister hi Vangchhia VC leh khawtlang te’n VC Office tualah hun tawi an hman pui a, he hunah hian minister chuan thu sawiin he project tan dan leh hna thawh tawh te a sawi a. Project tantu chu sawrkar ni mah se, a thawk hah tur leh a hlawkna tel tur chu mipui an nih thu a sawi a, Mizoram hmun hrang hrangah khualzin hip tura hmunhma leh event siamchawp a ngaih laiin Vangchhia chuan mikhual hiptu tha tak an neih sa avangin an vannei hle a, mikhual tam zawk an neih zel theih nan project kal mek tha taka lo enkawl tur leh mikhual lo chhawn tha zel turin a fuih a ni.
Minister hi R. Lalrodingi, Director, Tourism Department; Henry C. Lalrawnkima, Secretary, Mizoram State Sports Council leh Vangchhia khawtlang hruaitute an tawiawm a ni.
Vangchhiaa project hi “Development of Basic Amenities under PRASHAD Scheme at Vangchhia” tih a ni a, cheng vaibelchhe 5.4732 senna tur a ni. A hmunah hian rainwater harvesting tank te, solar streetlight leh khualzin mamawh leh lawm tur tam tak siam tum a ni. Kawtchhuah Ropui hi Archaelogical Survey of India hnuaia Protected Monument a ni a, “Menhirs and Caves at Vangchhia” tih a ni.
Tourist lodge aiah homestay: Tourism minister
