Daily Newspaper

Transfer & posting-ah sawipuitu awm thuai thin – Education minister

7

Zirtirtu transfer leh posting chungchangah siksawi hlekin sawipuitu an awm thuai thin tih Education minister Lalchhandama Ralte chuan a sawi.

Siaha-a DIET leh a department chan office dang a tlawhnaa thawktute nen an inkawmnaah Mizoram education thanmawh bawk pakhat chu zirtirtute chu Mizoram khawi hmunah pawh thawk thei tura lak an nih laiin, khawpuiah vek awm an tum tih a sawi. “Posting leh transfer han khawihin, han siksawi hlek ila, khawi khawi atangin emaw sawipuitu an lo awm thuai zel mai thin,” a ti.

Chief minister Pu Zoramthanga’n education hi a ngaipawimawh hle, tiin, “Kum hnih vel minister-a ka awm chhung ringawt pawh hian zirtirtu sang chuang kan la tawh a, recruitment ti nasa ber department kan ni hial awm e. Heti chung hian zirtirtu indaihlohna hi a la nasa hle,” a ti. Siaha district chu Mizoram puma zirtirtu indaihlohna tuar na deuh bik a nih thu leh tunah pawh high school zirtirtu lak tur tihfel vek tawh Covid-19 avanga recruitment kalpui hleihthei loh a awm mek thu sawiin, hengte an tihfel theih hunah chuan zirtirtu indaihlohna zualpui chu an tihfel theih an beisei tih a sawi a ni.

DIET lecturer-te chu zirtirtute training petu an nih avangin an mawhphurhna a sang hle tih Education minister hian a sawi a. Zirna lama thiamna chungchuang chauh ni lo, ngaihtuahna dik leh ngaihhlut tur dik zawk thlirthiam tura inthlakthlengna pawh infah hnem a tul tawh hle tih a sawi. “Lehkha thiamna chauh ni lo, kawng tinrenga khua leh tui tha mi ni tura chherchhuah a ngai a ni,” a ti.

Siaha district-a DIET (District Institute for Education and Training), DEO office leh Samagra Shiksha, DPC office te chu Lalchhandama Ralte hian a tlawh a. Mizoram district zawng zawng tlawhchhuaha Education office hmunhma leh inrelbawlnate hmuhpui vek a tum tih a sawi a. An harsatna leh mamawh hrang hrangte mit ngeia hmuhpui a, an harsatnate a rang thei ang bera sutkian theih dan a awm em tih hriatchian a duh tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy