Sawrkar officer-te chu hman tangkai an nih theihna tura sawn an ni thin a. Transfer sut tura insawipui chin chu sim a tha tih Department of Personnel & Administrative Reforms minister K Sapdanga chuan a sawi.
Foundation Training for Combined Civil Services Probationer 2023 batch chu Thawhlehni khan Administrative Training Institute hmunah hawn a ni a. Hmanpuitu DP&AR minister chuan officer tharte chu Mizoram sawrkar tinghettu, sawrkar innghahna, a ruhrel an ni tih a sawi. Service association hotute atanga fuihna thu an dawnte zawm theuh tura chahin, an hnathawh chu an rawngbawlnaa ngai turin a chah bawk.
Transfer and posting chungchangah, sawrkarin officer-te chu hman tangkaina turah transfer theih an ni, tiin, “Transfer sutlet tura insawipui hi sim a tha. Sawrkar hotuten transfer & posting a siam reng reng chu a tha ber tur ruahmanna nena a siam thin a nih avangin thuawih taka kan zawm tlan a tha ber ang,” a ti.
Officer tharte chu mawhphurhna sang tak hre tur leh sawrkar hnathawkte phuartu danin a phal leh phal loh chiang taka hriaa zawm turin a chah a ni.
Tun tumah hian MCS 10, MIS 5 leh MF&AS 12 ten foundation training hi an nei dawn a. A vawikhatna atan trainee-te hi ATI hostel-ah an training chhung an awm dawn a ni. A hawnnaah hian combined service-a tel service pali aiawhin an pawl hruaituten officer tharte fuihna thu an sawi a ni.
Transfer sut tura insawipui hi sim a tha – DP&AR minister
