Mizorama transformer zaa 68 vel chu a hman theih hun tura ngaih pel tawh a ni a, thlak tumin sawrkarin a leina tur sum a dah tih Power & Electricity minister F Rodingliana chuan a sawi a.
Assembly Session-a zawhna chhangin minister chuan, hmun tinah transformer a indaih lo a, transformer zaa 68 chu kum 20 hmalama lei tawh niin, hei hi a that hun chhung tura ngaih (lifetime) a ni a, a tam zawk chuan a pel tawh avangin sawrkar tharin transformer thar lei nan cheng vaibelchhe 7 a dah a, mamawh leh tul zual thlak tum a ni tih a sawi.
Sawrkar laipui ruahmanna, RDSS (Revamped Distribution Sector Scheme) sum hmangin Aizawl khawpui chhunga electric wire hlui tawhte thlak mek a ni a, hei vang hian tunlaiin electric current pawh a thim zin phah a. Km.20 vel hrui tharin thlak mek a ni tih a sawi.
Lunglei leh hmun dangah electric hrui hlui, alluminium ang chi ho a la awm nual a, thlak mek a nih bakah a vaia thlak a nih theih nan central-ah RDSS hnuaia modernisation scheme-ah cheng vaibelchhe engemawzat sum dil belh mek a ni a, chumi phalsak an nih hunah thlak tum a ni tih a sawi a ni.
Lawngtlai leh Siaha lam electric current thim zin chhan hi an inzawt chiang a, a hrui a lo hlui tawhin a disc pawh a chhe tawh a. Ruah sur loha current kaltlang kha ruah a surin a disc khi ah current a lut thei a, sum awm ang angin thlak mek a ni a, thal chhunga siam zawh hman an tum tih P&E minister hian a sawi a. Electric hruipui hlui leh ban hlui, ramhnuai hmun rem lo tak taka kal leh a hrui hniam lutuk thin chu theih ang angin RDSS hnuaiah leh Housing for All hnuaiah tih thata thlak tum mek a ni tih a sawi bawk.
Transformer thar leina dah Electric hrui hlui thlak mek
