Tun hnaia Treasury bazar kang avanga helai bazara thu thinte AMC Multi Complex-a sawn tura AMC-in March ni 17, 2025-a Order a chhuah hnuah, DC Aizawl thupek angin March ni 18, 2025 khan helai hmun hi hung nghal a ni a.
Helai bazar-a thu thinte pawh AMC Multi Complex lamah an insuan luh mek laiin, March ni 25, 2025 zingkarah khan Venghlui mipui thenkhat chuan bazar kang hungna Gate tichhiain, kangmeiin a tihchhiat bazar seat te an siam tha a. Helai hmun hi luh phal lohna a nih avangin Venghlui mipui thenkhat pungkhawmte hian sawrkar dan pawisa lovin an bawhchhia tihna a ni.
Helai hmun hi Mizoram rorelna in sang ber Legislative Assembly House awmna a nih avangin, security measure atanga thlirin helai rorelna in sang ber building hne renga bazar a awm hi a him lo hle a, tunhma atang tawhin helai bazar titawp tur hian hma lak a lo ni tawh thin a ni.
Heng zawng zawng hi Venghlui Local Council leh a veng mipuite pawhin an hre vekin a rinawm a. Chuta chhapah, state sawrkar leh Aizawl khawpui sawrkar AMC-in dan hmangin helai hmun hi a valh tawh a, chuti chunga dan kalha hmalakna a thleng ta tho hi thil mak tak niin a lang.
A chhan chu, Veng chhung inrelbawlna kengkawh turin khawpui sawrkar AMC hnuaiah Local Council a awm a, Local Council chuan AMC thupek a hlawhtlinna turin hma a la tur niawm tak a ni a. Chutiang a nih laia Venghlui mipui thenkhatin AMC kalh hnan hmun khuahkhirh luhchhuaha sawrkar thupek kalha hma an la hi hnuhma duhawm lo tak a ni.
Municipal Commissioner-in, helaia dan kalha hmalakna titawp tura hmalakna report March ni 26, 2025 tlai dar 4 hmaa thehlut tura Venghlui LC hnena thu a lo pek tawh angin, nimin khan Venghlui LC chuan ziakin hmalak dan a thehlut a. AMC Mayor-in Assam Rifles chhuahsan ram a sih hmuh tak avanga hmalakna chhunzawm lova ‘status quo’ a awm chu Venghlui mipuite pawhin an remti ta niin Venghlui LC chuan report-ah a tarlang a ni.
Heti a nih chuan, thuneitute nawrna atan ‘violence’ chelek hi hmanraw tha tak a ni tiin tun hnu zelah pawh hetiang hi kalphungah kan nei chhunzawm mai ang tih a hlauhawm hlel lo a ni.
Treasury Bazar: LC vrs AMC
