Zo Reunification Organization (ZORO) leh Nagaland Indigenous People’s Forum (NIPF) chuan tunhnaia sawrkar laipui hmalakna hrang hrang chu an mite tan remna leh muanna tichhe thei leh nghawng tha lo hrang hrang nei thei a ni tih an sawi.
ZORO leh NIPF hian memorandum siamin, heta tarlan danin, ramri lehlam amite nena inkalpawh theihna – Free Movement Regime (FMR) titawpa ramri hung kalpui chu India, Burma leh Bangladesh-a cheng Chin, Kuki leh Mizo leh India leh Burma-a cheng Naga-te thendarhtu tur a ni, an ti a. Citizenship Ammendment Act pawh chhungkaw inkungkaihna leh inhmangaihna tichhe thei leh dan loa ramchhunga lo lut ti tam thei thil a ni tih an sawi a ni.
Forest Conservation Act 2023 pawh an ram luah tam tak, eizawnna bera an hman leh an innghahna ber, nasa taka chan theihna a ni tih ZORO leh NIPF hian sawiin, Uniform Civil Code chu hmarchhaka cheng tribal ho hnam nihphung leh nunphung thlenga tichhe thei a ni tih an sawi. Hmarchhak mipui thliarbik ni awm taka kalpui mek, Armed Forces Special Power Act 1958 pawh tihtawp a hun tawh nia an hriat thu an sawi bawk.
India sawrkar chu United Nations Declaration on the Rights of Indigenous Peoples 2007-a hming ziak ve a nih angin, he danin a phut ramri avanga harsatna hrang hrang nei, hnam tenaute dikna chanvo humhalh chu India sawrkar tih tur a ni tih an sawi a. Heng an himna atana tha lo dan hrang hrang hi hnukkir turin India sawrkar an phut tih an sawi a ni.
Tribal mite tana dan tha lo hnukkir turin India an phut
