Daily Newspaper

Tribal Power charity live show a hlawhtling; ‘Bengkhuaia Lehkhathawn’ MV an tlangzarh

9

Zirtawpni zan-a Tribal Power-in COVID-19 donaa a hmatawnga thawktu te tanpuina tura vehbur kawnna charity live show an neih chu a hlawhtling hle a, he live show-ah hian COVID-19 donaa a hmatawng a thawktu te pualin ‘Bengkhuaia Lehkhathawn’ music video an tlangzarh nghal bawk.

He charity live show hi LPS nen thawkho a an buatsaih a ni a, Tribal Power bakah Slick Jive, Atari Minor, Coincedance, The Prophets leh Mood Swingers bakah soloist Arini te pawh an perform a, Tribal Power baka band dang perform te hian Tribal Power hla hrang hrang an cover a ni.

Tribal Power frontman OP-a chuan an beisei aiin thawhlawm pawh a lut tha niin a sawi a, a sum lam hi management team lamin an buaipui a ni a, Zirtawpni zana thawhtu te hian a sum hi an la pe kim lo va, OP-a chuan, “Rawn lam rawh u, tih te kha an awm nual bawk a, a la lut kim lo viauin ka ring,” tiin nimin tlai khan a sawi a, a hriat theih chinah charity atana thawhlawm tlingkhawm chu Rs 2,00,000 vel a ni tawh thu a sawi a, an la lut leh tur zat hi chiang taka sawi theih a ni lo nain, hetiang zat vel dawn hi a tling leh thei maiin a rinawm.

Charity show zana an music video tlangzarh hi 1996-a OP-a solo album ‘Bengkhuaia Lehkhathawn’ title track niin, tunah hian kan boruak tawn mek, COVID-19 donaa a hmatawnga thawktu te pualin Tribal Power angin music video an siam thar a ni.

Charity live show hi Chanmari YMA Hall-ah neih a ni a, mipui an awm lo va, band perform tur bakah crew tlem a zawng an awm tih loh chu hall a ruak huai mai a, OP-a chuan mipui awm lohna hall-a concert chu a boruak a danglam ve riau niin a sawi a, “Mipui awm ngeia concert chu a nuam daih a, mahse, tun tum show chu a nuam ve tlat. Rilru a hahdam riau,” a ti a, an show neih chu an band intihlar tumna a ni lo tih sawiin, “Tribal Power intihlarna tur a ni lo va, kan frontline worker te tana kan tih a ni. Band dang he show-a rawn tel te pawh an phur em em vek a ni,” a ti bawk.

Band hrang hrangin Tribal Power hla an cover chu ngaihthlak nuam a tih thu sawiin OP-a chuan, “Mahni version deuh te a cover te pawh an awm a, a tha ka ti hlawm lutuk, ka hmu ning lo a, ka en ka en mai. Musician te hi an lo changkang tawh lutuk. Thiam tak an ni ringawt mai,” tiin band perform te a fak hle a ni.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy