Daily Newspaper

Tribal Power hla thar tur ‘Lamtluang thui i rawn hrût’

11

Kar liamta khan state dang atanga Mizoram mamawh rawn phur lut tu, driver pakhat chu kawngsirah chau takin let dêr mai a, an han bawihsawm a, a chanchin a darh ta zel. He driver hi a motor khalh bula chau taka a mu lai thlalak te pawh a darh chak a viau a nih kha, kha driver thlalak avang khan Tribal Power hla thar ngaihthlak tur kan neih phah dawn ta. Tribal Power chuan an hla thar tur ‘Lamtluang thui i rawn hrût’ tih chu hmanhmawh taka buaipui a, tihchhuah deuh vat an tum niin an frontman OP-a chuan a sawi.

He hla hi OP-a phuah niin, “Hnam dang driver thlalak leh chanchin atang khan ngaihtuahna a kal thui a, vai ramah te kan lo zin a, highway te ka ngaihtuahin, kan ram chu a pilril si a, fur ruahtui tam lai lo ni leh kawng tha tawk lo nen, hripui karah kan mamawh phurin khûta tangin an lo kal a an khawngaihthlak. Truck driver ten kan ram mamawh an rawn phur a, an hna a nia, an tih tur alawm kan tih theih tho rualin, kha kha keimahni leh kan ram tan an rawn inhlan ve ang deuh zawngin, hlaah chuan hetiang zawngin kan lo chantir ve ta a ni,” a ti.

OP-a hian hla a phuah ve nual tawh a, mahse, tam tham phei chu a la ni lo, a hla phuahte erawh kan tuipui hlawm viau zel thung. Hla a phuah ve chhunah chuan a zo thuai mai thin niin a sawi a, “Rei deuh ka phuah ngai lo, a lan chuan darkar khat velah ka ziak zo vek zel,” a ti.

Tunah hian hla pakhat ‘Hirosima’ tih pawh a nei reng tawh a, mahse, hei hi chu a thluk a la nei thei lo, “A hla hi a sei deuh bawk a, a thluk tur hi a la awm thei lo,” a ti a, he hla hi Khawvel Indopui Pahnihnaa Japan ral lian, an inhnuh kir leh tak dan leh Mizoram buai a Mizo sipai te India sorkar nena inremna ziah hnuah mahni ram lamah an kir leh dan te leh, chumi phena hnam sipai te rilru tur awm a chhui dawnna te hlaah a phuahna a ni ve thung.

Tribal Power intuaithar leh hian hmanni lawkah an ‘Speed 30,000′ music video an tichhuak hlim deuh hlawl kha a ni a, tunah hian’Lamtluang thui i rawn hrût’ tih hla pawh hi hmanhmawh taka buaipuiin, tihchhuah deuh vat an tum dawn a, ‘Hirosima’ erawh la nghah deuh a ngai dawn a ang kawp mai.

(THE AIZAWL POST – Thalaite Huang)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy