Triple amputee ni chunga mahni chauha lawng hmanga tuipui kân thei hmasa ber
UK a sipai bang Craig Wood chu a ke pahnih leh a ban vei lam tan (amputee) niin, ban dinglam chiah nei chungin, mahni chauhin, pawnlam atanga puihna pakhatmah dawng lovin, lawng hmanga tuipui kân thei hmasa berah Guinness World Records-in a puang.
Craig hian a lawng, feet 41 a sei, catamaran Sirius II hmangin, Puerto Vallarta, Jalisco, Mexico atangin March ni 25 khan a inkalh chhuak a, tuipuiah ni 90 thangin, nautical mile 7,500 (km 13,900 vel) a tui a kal hnuah, June ni 24 khan Hiroshima, Japan a thleng a, Pacific Ocean a kân thei ta a ni.
Craig hi kum 18 a tlinin sipaiah tangin, ral do tura a chhuahna hmasa ber, Afghanistan-ah rahpuah bomb a rah palh avangina ke pahnih leh a ban veilam tan a ngai ta a ni. He a thil tawn avangin a taksa hliam mai bakah rilru lam thlengin harsatna a tawk nasa hle a, kum li zet a inenkawl hnuah ke lem hmangin a kal leh thei ta a ni.
A dam leh tak hnu chuan mahni awm hmuna indawm kun mai lovin, a naupan lai atanga nuam a lo tih thin lawng khalh lamah a inhmang leh ta a, kut pakhat chauh nei chunga lawnga han chettlat vel pawh a zir leh fê a ngai a, tunah chuan Guinness World Record a siam ta a ni.
Craig chuan, “I zuam loh avanga i la tih ngai loh thil ti thei lo anga inngaiin, i hun khawhral mai mai suh. I tih theih leh theih loh chu i tih chhin hma chuan i hre ngai lo ang a, i theih loh tura i rin chu a tih theih dan kawng tam tak a lo awm reng tih i hmuchhuak fo ang,” a ti.
Triple amputee ni chunga mahni chauha lawng hmanga tuipui kân thei hmasa ber
