Truck chesualah a khalhtu thi

Aizawl atanga Siaha lam pan truck pakhat chu Haulawng bulah chesualin a khalhtu a thi a. A chuanpuiin hliam a tuar bawk.
Thudawn danin, Siaha lama eirawngbawlna gas bur tur truck, AS 11 CC 8766 chu Haulawng leh Mausen inkarah chesualin kawngthlangah metre 200 vela thui a lum a, a chetsual hun hi September 18 (Ningani) zan dar 8.00 vel nia hriat a ni.
Truck khalhtu Zakir Hussain (43) Sirchar chu a hmunah a thi a, mi chuang dang awmchhun a handyman chu hliam tuar chungin kawngpuiah a vak chhuak a, lirthei tlan vel chu a lo phar thin a, ding duh an awm lo niin a sawi.
Ningani zing khan Haulawng lam atanga Lunglei kal tur ten an chetsual thu hi hria in, Haulawng YMA hruaitute an hriattir a, Haulawng YMA bakah Mausen YMA leh Lunglei Police ten an buaipui zui a ni.
Truck handyman hian hliam na vak lo a tuar a, Haulawng PHC ah enkawl a nih hnu ah Lunglei Civil Hospital-a enkawl zui tura tih a ni. A sawi danin, kawng khuar lai deuh lo awm an hel a, a ke hmalam a chhuak hman a, a hnunglam kawng thlang lungremin a zo ta lo a, a chim thlakpui ta niin a sawi.