German Chancellor Friedrich Merz-a chuan Ukraine tana muanna a awm theih nana rawtna siam that thar chu US President Donald Trump hnenah an hlan tih a sawi a, hetah hian Kyiv-in ram hlan a tum theih dan pawh a tel tih a sawi.
Merz-a hian ram inhlan tel chungchang bik erawh ‘Ukrainian president leh Ukrainian mipuiten an sawi fel ngai leh ngaihtuah ngai a la ni’ tih a sawi tel.
“He mi chungchang hi President Trump-a hnenah pawh chiang taka thlen a ni,” a ti.
Tun hnai hun eng emaw chen chu European hruaitute hi Ukraine-a muanna a awm theihna tura ruahmanna siamin an tul hle a, Kyiv tana hlawkpui theih tur leh zawhna awm tam tak chin fel an tum.
Trump-a’n Ukraine indo tihtawp tumin a bei nasa hle bawk a, indo mekte inrem theih lohna langsar ber chu Russia-in Ukraine ram a neihsak tumna a ni a, hei hi US rawtnaah telh niin Kyiv-in a hnial a ni.
Trump-a palaite chuan Moscow an lo dawr tawh a, an tana pawm nuam leh hlawkpui tur zawk rawtna a nih avangin Kyiv-in European a thawhpuite hian US president hian Russian-te hamthat theihna turin Ukraine lakah thil a ti mai ang tih an hlau a ni.
Merz-a chuan Nato chief Mark Rutte-a nena thuthar lakhawmtute an kawmnaah, “Kum li chhung tawrhna leh thihna a thlen hnuah Ukrainian president hi a mite pawm theih loh muanna siamnaah nawr luh a nih chuan tihsual lian tak a ni ang,” a ti.
Nilainiah phone call-in Trump-a nen pawh tha taka an inbiak thu a sawi a. France President Emmanuel Macron leh UK Prime Minister Sir Keir Starmer te nen an pathumin European-ten ‘muanna a awm hi an duh hle’ tih pawh chiang taka an sawi thu a sawi.
President Vladimir Putin-a chuan eng inremna pawh siam se Russia-in Ukraine khawchhak lam Donbas region chu an chan vek a duh a, heti a nih chuan Kyiv-in an ram eng emaw zat an chân a ngai dawn a. Ukraine chuan Russia-in an rûna hlawkna an tel tur chu an pawm thei lo va, Zelensky-a chuan nakin zelah Moscow-in an ram a beih lehna atana remchangah a hmang zui ang tih a hlau bawk.
He lai ram inchuhna tak hi tuna indo mek ram hnih inkara inrem theih lohna lian ber pakhat a ni.
Ukraine hian Russia-in a beih nawn tawh lohna tura khawthlang ramte atanga himna neih tel a duh a. Hei hi Nato danpui Article 5-ah Kyiv thawhpuite an chet theihna tur dah tel duhna a ni tel.
European leh an thawhpui dangte chuan Ukraine-a sipaite tihchaka an tuipui leh boruak venna nasa zawk pek tha an ti a. Russia-in Ukraine-a European sipai awmtir tumna chu a duh lo thung.
US-in rawtna a neihah Ukraine-in sipai a neih zat chu 6,00,000-a tihtlem a rawt a, Kyiv chuan tuna a neih zat vel, 8,00,000 vel tal neih a duh thung a, November-a ngaihdan lakah chuan Ukrainian 78% chuan an sipai tihtlem chu ‘pawm theih loh bur’ niin an sawi a. Russia-in 15,00,000 a nei mek thung a ni.
Trump-a kutah Ukraine muanna tura rawtna hlan
