Donald Trump-a sorkar duh lohna lantirna lian tak tak chu US khawpui hrang hrangah huaihawt a ni a, tun hi No Kings rally neih vawi thumna a ni a, a hma lo huaihawt tawhah pawh mi maktaduai tam tak an pungkhawm thin.
A huaihawttute chuan US President Trump-a policy siam, Iran indona, federal immigration enforcement leh khawsakna man sang zel chungchangah lungawi lohna an lantir tih an sawi.
“Trump-a hian ama mi mal thuhnuaia min awp a duh a; mahse, hei hi America a ni a, thuneihna hi mipui ta a ni – wannabe king emaw, an billionaire thawhpui emaw ta a ni lo,” tiin an sawi.
White House thupuangtu chuan lungawi lohna huaihawtte hi ‘Trump Derangement Therapy Sessions’ tiin a sawi a, a ngaihsaktu awmchhun chu ‘an chanchin thehdarh tura pawisa an pek chanchinbu mite chauh’ an nih thu a sawi.
Inrinni (India-a chawhnu atanga zankhua) khan nilengin US khawpui lian zawng zawngah chuan kawngzawh a ni a, New York, Washington DC leh Los Angeles te pawh a tel.
Chawhnuah Washington DC khawpui chhung kawngpuiah kawng zawh a ni a. Lincoln Memorial rahkaah an ding a, National Mall pawh an luah khat vek bawk.
No Kings rally hmasa ang bawkin duh lohna huaihawtte hian Trump, Vice President JD Vance leh an sorkara thuneitu dangte lem an keng a, paih thlak leh man an phut.
Los Angeles-ah chuan mi pahnih chu sorkar laipui dan kengkawhtute an beih avangin man an ni tih Department of Homeland Security (DHS) chuan a sawi.
X-a thuchhuah an siamah officer pahnih chu cement block-a vawm an ni a, damdawi in panpui an ni a. ‘Rioter 1,000’ tia a sawi pawl pakhatin Roybal Federal Building an hual a, DHS agent-te chu an bei niin an sawi.
Khawpui chhung hmun dangah Los Angeles Police Department (LAPD) chuan federal jail bula pungkhawmte chu thupek an zawm loh avangin ‘tam tak man’ an nih thu an sawi bawk.
Reuters chuan Dallas-ah pawh man an ni awm tih a tar lang a, sorkar laka lungawi lote chhanlet nan a tantu lamten kawngpui an dang a, No Kings kawngzawh an tihbuai avangin ‘innawrna tenau a chhuak’ nia tar lan a ni.
October thlaa No Kings rally hnuhnung berah khan ram pumah mi maktaduai sarih vel zet an pung khawm.
US state eng emaw zatin National Guard inrintir mah se a huaihawttute chuan muanawm tak zelin thil an kalpui tih an sawi.
January, 2025-a White House-a a kir leh hnuah Trump-a hian president thuneihna chin a tizau va, executive order hmangin sorkar thil thenkhat thiah a ni a, state governor-ten an duh lo chungin khawpui tam takah National Guard sipaite a dah.
President hian ram din thar lehna turin a thil tih hi a tul thu a sawi a, dictator ang maia che nia puhna pawh a hnawl a. Sawiseltuten erawh chuan a kaihhruai sorkar hmalakna thenkhat chu dan kalh a nih thu leh American mipui rorelna tana hlauhawm a nih thu an sawi ve thung.
Trump-a sorkar duh lohna, No King rally thawm a lian
