Daily Newspaper

Trump-a’n a chakloh a la pawm duh lo zel

12

US President Donald Trump chuan Georgia Republican governor chu an state-a Joe Biden an inthlana chakna a chan chu letling turin a ngen.

Donald Trump chuan Governor Brian Kemp chu state legislature special session ko turin a ngen zui a. Trump hian Georgia-ah Senate inthlan campaign a nei zui dawn a ni.

President Trump chuan tun thlengin inthlanah chak lo nih a la inpawm duh lo va, finfiahna nei chuang si lovin Biden chakna chu inbumna vang tiin a sawi a ni.

State hrang hrangah dan hmangin a khing chungin a la hlawhchham deuh vek thung.

Georgia hi battlegorund state pawimawh tak niin Joe Biden chuan tlemte chauha chakna changin kum 1992 hnua Georgia a Democrat tena chakna an chan leh hmasak ber a ni bawk.

Tunah Senate thunun tumin inthlan pawimawh tak an hmachhawn leh dawn a. January thlaa inthlanna neih hunah Democrat tena chakna an chang a nih chuan Republican ten upper house an thununna an hloh zui dawn a ni.

United States President thlanna neihah Biden chuan electoral college vote 306 hmuin Trump chuan 232 a hmu a. Electoral College te hi December 14-ah thukhawm dawnin chutah chuan engkim tihchian a ni tawh ang.

Trump-a’n eng nge a sawi?
Washington Post chuan Trump chuan Kemp chu Inrinni zing khan hmuin absentee ballot signature te audit turin a ngen a. Chutianga audit ti tura thuneihna nei lo Kemp chuan Trump ngenna chu a hnawl niin newspaper chuan a tarlang.

Trump chuan a hma atang tawhin postal ballot kalpui nasat chuan inbumna tam tak a hring tiin a sawi a, a thusawi tichiang tura finfiahna a nei lo thung.

Trump Twitter kaltlangin governor chu nawrin, “Governor Brian Kemp emaw Secretary of State in signature verification kalpui se chuan awlsam takin Georgia-ah chakna ka chang ang. Eng vangin nge heng Republican pahnih te hian an tihduh tlat loh?” tiin a sawi.

Kemp chuan Trump hi chhang letin signature audit chu tum thum lai ngenna a siam tawh thu a sawi a. Hei hi chhang letin Trump chuan state legisature special assembly ko mai turin a ngen a ni.

Valdosta, Georgia a campaign a neihnaah President Trump chuan mipui te hnenah, “President thlanah bumna kalpuiin an tiching pen a, mahse, kan chak dawn tho,” tiin a sawi.

Hetihlai hian Georgia state election official Gabriel Sterling chuan Republican tho chuan President Trump chu US president thlana inbumna awm anga a sawi reng chu titawp tura ngenin buaina a hrin theih thu a sawi thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy