Trump-a’n an helicopter kap thlaah Iran puh, chhan let tiam

President Donald Trump-a’n Iran chu Strait of Hormuz bula US helicopter kap thlaah puhin ‘tul miah lova’ beihna hi chhan let a tiam bawk.
Beih a nih hnua chesual, Apache helicopter-a thawktu pahnih chu American sea drone hmangin chhanchhuah an ni tih US thuneitute chuan an sawi.
President chuan Truth Social-ah, “Pilot pahnih an tel a, an pahnih hian an him a, hliam an tuar lo,” tiin a tar lang a. “Heti hi ni mah se US chuan ‘tul lova beihna’ hi a chhan let a ngai a ni,” a ti.
Tun Iran nena an buai hnua Apache an hloh hmasak ber a ni a, Trump-a hian a hmain Washington chu Tehran nena an buaina titawp tura inremna siam an tum chu ‘a tawp’ an thleng tih a sawi.
US Central Command (Centcom) chuan sipai pahnihte chuanna AH-64 Apache helicopter hi ‘Oman tuipui kama an patrol lai’ an tlak hnu, ‘darkar hnih vel chhungin him takin chhanchhuah an ni a, an dinhmun a tha hle’ tih a lo sawi tawh.
Trump-a chuan Thawhlehni khan social media-ah, “Kan sipai ropuiten min hriattir chauh a, nizan khan Iranian-te hian Strait of Hormuz-a an patrol laiin kan Apache Helicopter thiam tak tak zinga pakhat chu an kap thla a ni,” a ti.
Eng tin nge a chhan let dawn tih erawh hriat a la ni lo.
Thawhlehnia thuchhuah an siamah Centcom chuan sipai pahnih hi Thawhtanni zan dar 07:33 (India-a Thawhlehni zing dar 06:03) khan chhanchhuah an nih thu a sawi.
Thuchhuah chuan, “Chhanchhuah hna hi US Naval Forces Central Command leh 82nd Airborne Division-te kaihhruaina hnuaia kalpui a ni a, US Air Force leh Navy unit-te pawhin an pui a, US 5th Fleet-a Task Force 59 pawh a tel a ni,” a ti bawk.
Apache-a chuang US Army sipai pahnihte hi Oman tuipui kamah an patrol laiin chhiatna hi an tawk a. AH-64 Apache a tlak atanga ‘darkar hnih vel chhungin’ chhanchhuah an ni.
Centcom thupuangtu chuan BBC hnenah sipaite hi uncrewed surface drone hmanga chhanchhuah an nih tih a hrilh a, hei hi kum 2024-a Bahrain-a unit din, Task Force 59-in a enkawl a ni.