Daily Newspaper

Trump an ‘birther’ theory vawrh chhuak leh tawh

39

President Donald Trump chuan Democratic running mate Kalama Harris chu US vice president ni turin ‘a qualify lo’ tih thuthang a hriat thu a sawi.

Harris hi Jamaican leh Indian nu te inkarah 20 October 1964 khan Oakland, California-ah a piang a.

Mahse, conservative law professor-te chuan danin a pawm theih leh theihlohah zawhna an nei thung.

Kum tam tak chhung chu Trump chuan President Barack Obama chu US-ah a piang lo tiin ‘birther’ theory a vawrh tawh bawk a.

Harris hi California senator ni lai mek niin Thawhlehni khan mingo ni lo hmeichhia US presidential ticket main-party tena an pek hmasak ber a ni a.

Democratic White House candidate Joe Biden deputy tur niin Trump leh Republican te nena November thlaa general election neihah an inkhing dawn a ni.

Trump an eng nge a sawi?
Press conference a neihnaah Harris chungchanga zawhna a neih te zawh a nihin Trump chuan, “Vawiina ka thu hriat ang chuan candidate ni turin a tling lova, he mi chungchang ziaktu lawyer chu mithiam tak leh lawyer tha tak a ni,” a ti a.

“A dik leh dikloh ka hre lo va. Democrats te chuan vice-president atana an chhawp chhuah hmain an enfiah vek turah chuan ka ngai,” a ti bawk a.

“Mahse, thil pawi mawh tak mai a ni a, nangni pawhin in sawi a, anni pawhin an sawi a, he rama piang hi a ni lo an ti a ni,” tiin a sawi.

Reporter pakhat chuan Harris chu US-ah a pian leh pian lohah sawi buai tur a awm lo va, mahse, a nu leh pa chu a pian laiin dan ang thlapa US-a chen phalna nei an ni lo mai thei tiin a sawi bawk.

Ningani khan Trump campaign adviser Jenna Ellis chuan conservative group Judicial Watch hotu Tim Fitton a tweet a retweet bawk a. Chutah chuan Fitton chuan Harris chu ‘US Constitution’s ‘Citizenship Clause’ hnuaiah Harris chu Vice President ni thei a ni lo’ tiin a sawi.

Hei bakah hian Newsweek magazine a John Eastman, Chapman University, California a law professor-in ngaihdan a ziah a share zui bawk.

Law professor ngaihdan?
Prof Eastman chuan US Constitution Article II chuan ‘mi tu pawh US a piang lo chu President an ni thei lovang’ tih a nih thu a sawi a.

Hei bakah hian Constitution 14th Amendment chuan ‘United States-a piang tupawh…US thuneihna huama awm te chu khua leh tui an ni’ tih a nih thu a sawi.

Prof Eastman a hnialna inchuktuahna lai ber chu Harris chu a nu leh pate kha entir nan an fanu California-a a pian lai khan student visa chauh nei an nih theih thu a sawina a ni.

Kum 2010 khan Prof Eastman hian Republican California attorney general candidate niin Steve Cooley a hneh lo va, Cooley hi Harris chuan general election-ah a hneh zui thung.

Newsweek op-ed a Prof Eastman article tihchhuah a nih hnu hian sawiselna a nasa hle a. Mahse, Editor-in-chief Nancy Cooper chuan an dinnaah an din ngheh tlat thu sawiin Prof Eastman article chuan ‘racist birtherism nen inzawmna a nei lo’ tiin a tang tlat thung.

Constitution expert ten eng nge an sawi?
US Constitutional expert Erwin Chemerinsky, dean of Berkeley Law School chuan Harris chungchanga inhnialna chu ‘mawlthlak tak zet’ tiin a sawi thung a.

“14th Amendment section 1 hnuaiah mi tupawh United States-a piang chu United States khua leh tui a ni mai,” tiin a sawi a.

“Supreme Court chuan hei hi kum 1890 atangin a kalpui tawh a. Kamala Harris hi United States a piang a ni,” tiin a sawi bawk.

Laurence Tribe, constitutional law professor, Harvard University leh President Trump sawisel fotu chuan Prof Eastman ngaihdan chu ‘hnawm hnawk’ tia sawiin ‘racist birtherism chawhnunna’ tiin a sawi bawk.

Eng tiangin nge Trump an Obama ‘birther’ theory a tihalh?
Kum 2011 daih tawh khan Trump chuan right-wing theory President Obama chu Kenya-a piang a ni mai thei tih chu a vawrh lar a.

Obama meuh pawhin a pianna birth certificate copy pholang a, Hawaii a piang a nihna finfiahna a sawi chung pawhin Trump chuan ‘a lem’ a la ti hram bawk.

Mahse, September 2016-a press conference a neihnaah zawh nawn leh a ni a, “Ka duh tawk tawh e. President Obama hi United States-a piang a ni,” tiin a sawi thung.

Trump hian kum 2016 khan Republican lama a elpui Ted Cruz ppawh preisdent ni thei a ni lo, a chhan chu US khua leh tui a nu leh a pa Cuban te inkarah Canada-a piang a ni, a lo ti tawh bawk.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy