Trump-a’n BRICS te thil tum dodalna sawichhuak
US president-elect Donald Trump chuan US dollar nena inel tur pawisa siam an tum thawm a hriat hnuah ram pakua awmna BRICS te thiltih chu a dodal ngei dawn thu a sawi.
Trump hian BRICS ramte hian dollar atanga inhnuhdawh an tumna chu thil awm lo hulhual a nih thu a sawi a, ‘kan dinnaah nghet takin keini chu kan ding dawn,’ a ti.
Brics inzawmkhawm pawlah hian khawvel ram lian China leh Russia te an tel avangin US hian en liam mai mai a tum loh thu president-elect chuan a sawi a; khawvela economy ram hausa ni chho mek Brazil, India, South Africa, Iran, Egypt, Ethiopia leh UAE te an awm ve miau avangin dollar hmang lova pawisa hlutna dang siamchhuah tumna thawm a riring tan hle a ni.
US inthlanpui neih dawn lai khan Trump chuan chhiah lak nat a tum thu a sawi nasa hle a, dollar bansan tumtute vau nan hei hi inthlan auhlaah pawh a lo hmang nasa tawh hle bawk.
Kumthar january 20-a thuneihna chang mai tur Trump hian Brics ramte a hmu mawh nghal hle nia sawi a ni a, economy lama an chak chhoh hlawm avangin US nghet leh chak taka kal vungpui a tum hle bawk nia sawi a ni.
Brazil leh Russia rama politician lar tak takte chuan khawvel sumdawnna lama US dollar in thuneihna a nei sang hle chu thunun an duh thu an sawi fo a, hemi tihziaawm nan hian Brics pawisa siam hi rawtna lo awm ta pawh nia sawi a ni. Hemi chungchangah hian Brics ramte chuan engmah thutlukna an la siam lo thung.
Trump-a’n BRICS te thil tum dodalna sawichhuak
