Daily Newspaper

Trump an ‘climate change’ hnawl chhunzawm zel

8

President Trump chuan kangmeiin a tihbuai California a tlawhnaah climate change kaihhnawih hnawlin official te hnenah ‘a vawt tan mai ang’ tiin a sawi.

California, Oregon leh Washington state-ah te ram kangin ram hectares maktaduai 2 a kang tawh a, August thla atang khan kangmei kaihhnawihah mi 36-in nunna an chan phah tawh.

Climate change ringhleltu Trump chuan ramngaw kang chu forest management chhiat vangah a puh a ni.

A hmain Thawhtanni khan Democratic presidential candidate Joe Biden chuan Trump chu ‘climate arsonist’ tiin a sawi bawk a.

Delware a campaign a neihnaah Joe Biden chuan White House-ah kum li dang Trump a thu a nih chuan ‘America a kang nasa zual ang’ tiin a sawi bawk.

US West Coast a tlawhnaah Trump chuan Californian official te nena an inhmuhnaah kangmei chhuah chhanah forest management chhiat vang, a ti a.

Official pakhatin climate chungchanga ‘science hnawl lo’ tura a ngenna chhangin Trump chuan, “A vawt tan ang, lo en reng rawh u. Science in a hre tak takin ka hre lo,” tiin a sawi.

California-a ram ngaw kang turu takah climate change vang a ni em tia reporter-in a zawhnaah pawh Trump chuan, “Management kaih hnawih thil zawk niin ka hria,” tiin a chhang bawk.

Australia leh Amazon rainforest-ah te tun hnaiah nasa taka kangmei a chhuah chhanah climate change puh a ni chungin ram dang te chuan ram ngaw kang an tawng nasa lo tiin Trump chuan a sawi bawk.

“Harsatna kan tawh ang an tawk ve lo,” tiin a sawi a, “Thingkung kang duh tak an nei chungin, kan harsatna tawh ang an nei ve lo,” a ti.

Trump chuan, “Climate change vang in tih chuan India ramin a kalphung a thlak a ngai dawn a, China pawhin a thlak a ngai ang a, Russia pawhin a thlak a ngai ang,” tiin a sawi bawk.

Politician ten eng nge an sawi?
Trump nena meeting an neihnaah Thawhtanni khan California Governor Gavin Newsom chuan ‘forest management kan kalpui tha tawk lo’ tiin a sawi a, mahse, California ram zahve aia tam chu state thuneihna ni lovin federal hnuaia awm a nih thu a sawi thung.

Mahse, ram ngaw kang chuan climate change chungchanga inhnialna chu a titawp tiin a sawi thung a.

“A lum a, a lum tial tial a, a ro a, a ro tial tial bawk” tiin a sawi a. “Science-in a sawi te a takah hmuh theihin a lang tawh a. Climate change hi thil tak tak a ni a, a nasa zual zel bawk,” tiin a sawi.

Oregon Governor Kate Brown chuan an state chuan ‘kangmei duhthusam’ an hmachhawn thu sawiin ‘West Coast a climate change hmahruaitu a ni’ a ti bawk a. “Kan vai atan thanharhna tur niin climate change tinep turin kan theihna zawng zawng kan hman a ngai a ni,” tiin a sawi bawk.

Washington Governor Jay Inslee chuan thil awm mek dan chu ‘thupuan’ tia sawiin Trump-a climate change ngaihdan chu a dem thu a sawi bawk.

Kar kalta Inrinni khan President Trump chuan kangmeiin a nuai West Coast te a tawrhpui thu sawiin mahse kangmei chu ‘forest mangement kaihhnawih’ tiin a sawi thung a. “Hetiang anga nasa hi an la tawng ngai lo” tia sawiin, “He thumal hi hre reng rawh u, a holam lutuk, forest management,” tiin a sawi a ni.

Trump hian a hmain climate change chu ‘phuahchawp’, ‘awm tak tak lo’ leh ‘intihderna manto’ tiin a lo sawi tawh a, chutih rualin ‘thupui tak’ tiin a sawi tho bawk.

Paris climate agreement ram 187 tena tun kum zabi chung ngeia khawvel temperature chu 2C (3.6F) a pre-industrial level dinhmuna dah tuma hmalakna atangin US chu a inhnuhdawhpui tawh a ni.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy