Daily Newspaper

Trump-a’n conservative Amy Coney Barrett thlang

10

US President Donald Trump chuan Amy Coney Barrett, social conservative te duhthlan chu Supreme Court justice atan a ruat thar.

White House Rose Garden-a puanchhuahna a neihah Trump chuan ‘hmeichhia a hlawhtlinna ang nei awm ve lo’ tiin a sawi.

Senators tena an pawmpui a nih chuan Judge Barrett chuan kum 87 mi nia tun hnaia thi Justice Ruth Bader Ginsburg a thlak ang.

Trump-a nomination siam hian November inthlanna neih hmain Senatae-ah inbeihna nasa tak a thlen ngei tura ngaih a ni bawk.

Judge Barrett-a nominee a nih thu a puan pahin President Trump chuan Barrett chu ‘mithiam leh judge tha’ tia sawiin ‘constitution a rinawm tlat’ tiin a sawi bawk.

Democratic presidential canddiate Joe Biden chuan Senate chu ‘American tena president thar an thlan fel hma chuan Supreme Court judge ruat lo’ turin a lo ngen tawh thung a.

“United States Constitution hian voters te chu Court-a thu tur an duh ang thlang turin thuneihna a pe a ni. Chu hun chu tun hun hi a ni a, an ngaihdan ngaih pawi mawh tur a ni,” tiin a sawi.

Juge Barrett hi pawm a nih chuan conservative awn judge in thuneihna Supreme Court ah hun rei tak an nei dawn a, Barrett hi pawm a nih chuan 6-3 majority an nei dawn a ni.

Kum 48-a upa Barrett hi Republican President-in kum 2017 a Neil Gorsuch leh kum 2018 a Brett Kavanaugh hnua jutice pathum a ruatna tur a ni bawk ang.

US Supreme Court ah judge pakua awmin damchhung judge nihna chelh vek tur an ni a, an thuneihna a sangin thutlukna tawp a awm a ni. US in gun leh voting rights atanga nau tihthlak leh campaign finance thlengin Supreme Court thu chu thu tawp a ni zel a ni.

Tun hnaiah court chuan state 50 ah mawngkawhur inneihna a rem ti a, Trump-a’n Muslim ram te laka travel ban a kalpui pawh a pawm pui a, US-in carbon emission tihhniam tuma a hmalakna pawh a pawtsei bawk.

Tu nge Amy Coney Barrett?
Notre Dame University Law School, Indiana atanga a graduate hnuah Justice Antonin Scalia clerk in a thawk a. Kum 2017 khan Trump chuan Chivago a inbun Circuit Court of Appeals-ah a lo ruat tawh bawk.

Catholic ruh tak niin kum 2013 kha ‘life begins at conception’ a lo ti tawh a. Hei vang hian sakhuana lam ding chang se duh conservative te chuan an ngaina hle a, kum 1973 Supreme Court thutlukna siama US puma nau tihthlak phalna siam danglamna tura rintlak tura an ngaih a ni zui a ni.

LGBT group te chuan Barrett telna conservative Catholic group People of Praise te, mipat hmeichhiatna chu mipa leh hmeichhia innei te inkarah chauh hman a ni tur a ni titute nasa takin an sawisel thung.

Judge Barrett hian a hma pawhin President Trump an immigration policy a neih leh gun right chungchangah Trump thutlukna awnin thuremna a lo kalpui tawh bawk.

Conservative te chuan Barack Obama kalpui Affordable Care Act- health insurance scheme kalh zawngin thuremna a siam an beisei bawk a. Obamacare hi court-in a hnawl a nih chuan Americans maktaduai 20 vel te chuan health coverage an chân thung ang.

Senate Democratic leader Chuck Schumer chuan Judge Barrett chu pawm a nih chuan Obamacare tawpna a ni nghal ang tiin a senator pui te a hrilh nghal thung.

Judge Barrett thung chuan Supreme Court justice a nih anga thutlukna a siam reng reng chu dan behchhan vek a nih tur thu a sawi thung a. “Judge te hi policy siamtute an ni lo, policy kaihhnawih thlirna an nei tur a ni lo,” tiin a sawi.

Judge Barrett hi nemngheh a ni ang em?
White House chuan Republican Senate office te chu Barrett nena inhmuhna siam turin a be pawp der tawh a.

Nominee chung changa thuneihna nei panel Senate Judiciary Committee chu 12 October ah thu tan tura ngaih niin ni thum ni li vel a awm thin a, he committee chairman chu Lindsey Graham a ni.

He mi hnu hian committee member te chuan President nominee chu Senate-ah thawn tur a ni em tiin vote an la ang a. Senator 100 te chuan an pawm emaw hnawl emaw turin vote an thlak ang.

Republican te hian Senate-ah majority neiin Senator 53 an awm a, Judge Barrett pawm a nih nana vote mamawh 51 chu an nei tling a ni. Senate majority leader Mitch McConnell chuan 3 November inthlan hma ngeia vote thlak a nih tur thu a sawi tawh bawk.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy