Ram pahnihten an inkara sumdawnna tur inremna siam an tum mek laiin US Secretary of State Marco Rubio-a chuan nakkum kum tir lama President Donald Trump-a’n India a tlawh tur ruahmanna siam a tum thu Indian chanchinbu, IANS hnenah a sawi.
Rubio-a hian kumin hian president-in tlawh tura inbuatsaih nan India a tlawh zin a rinawm thu IANS-in a kawmnaah a sawi bawk.
IANS chuan Rubio-a hian, “Nakkum kum tir lam, engtikah emaw president lo kal turin kan buaipui mek a ni,” a ti tih an tar lang.
Prime Minister Narendra Modi-a hian kar hmasa khan France-a Group of Seven summit neihna karah Trump-a hi a lo hmu tawh a. President pawhin inkawmna hlawk tak an neih thu a sawi.
India hian thla tam tak chhung chu Trump-a’n a tlawh theihna turin US a nawr tawh a, Japan leh Australia nena an inbiaknaah pawh tel turin an sawm bawk.
Washington-in Indian bungrua a lak luhah chhiah sang tak avang te, Russian tuialhthei a lei avanga New Delhi hi a hrem zui vang te leh India hmelma lian ber pakhat, Pakistan nena inzawmna a tihngheh hnuah India leh US inkar hi a tha lo hman hle.
Rubio-a hian thla hmasa khan India hi an inkar tihthat tumin a lo tlawh tawh a; mahse, Gulf-a US Navy-ten sumdawn lawng an beihnaa Indian lawng hnathawk an thih avangin inlaichinna chhe thar leh.
IANS-in an kawmnaah Rubio-a chuan US leh India inkara sumdawnna inremna siam a beisei thu a sawi a. “Kan tihfel theihna tura tih ngai hnuhnung ber kan thleng a, a dinhmun a tha hle tawh a ni,” a ti.
Trump-a’n India a tlawh nan kan inbuatsaih – Rubio
