Trump-a’n indo titawp tawha a insawina, Congo-ah la indo reng

Trump-a’n indo titawp tawha a insawina, Congo-ah la indo reng
US President Donald Trump-a’n indo a tihtawp a sawi zingah Congo khawchhak lama inbeihna a tel nia a sawi chu a mi cheng, buaina zir chiangtu leh mi dang eng emaw zatin a dik lo tih an sawi.
June thla khan Congo leh Rwanda ramten inremna ziakin Congo khawchhak lama inbeihna hi a tawp a ni.
Trump-a chuan Thawhtanni khankum tam tak buaina awm tawh a titawp nia a insawi rualin Congo chu Africa-a ‘a thim leh hrehawm lai’ a nih thu a sawi a. “Kum 35 chhung buaina a awm a, mi maktaduai kua thah an ni a. La titawp a, mi tam tak nunna ka chhanhim a ni,” a ti.
Congo khawchhak lamah hian Rwanda-in a puih M23 hel leh Congolese sipaite inbeiin helho hian khawpui pawimawh tak tak pawh an la a. Qatar hmalaknain inremna ziah a ni a, an inremna erawh bawhchhiaah an la inpuh tawn reng.
Indona hi a titawp tawh angin Trump-a’n sawi mah se South Kivu province, Kabare-a human rights inspector, Ciruza Mushenzi Dieudonné-a chuan Bugobe, Cirunga, Kagami leh Bushwira khuaa chengte chu M23 leh Wazalendo hel inbeihna avangin an la tlanchhe reng niin a sawi.
Amnesty International-a an hotu pakhat, Christian Rumu pawhin hmun tam takah inkahna a la awm tih a sawi a. “Indona titawp anga insawina hi a takah chuan a ni lo,” a ti.
“US president hian thil a sawi sual a, a hmunah hian mihring dikna chanvo palzutna tam tak a la thleng,” tiin a sawi a, Trump-a chu muanna a awm theih nana nasa zawka hma la turin a ngen nghal.
Indonain nasa takin a tihbuaio leh M23-in khawpui an lak hmasa ber, Goma-a zirlai pakhat pawhin June-a inremna ziah chuan engmah a tidanglam lo niin a sawi.
“Inremna kha in en chuan, vanduaithlak takin khawi ram ve ve pawh khan an bawhchhiata hremna a inziak tel lo,” a ti a. “US hian American-te hlawkpui tur chauh a ngaihtuah a ni,” a ti.
Goma-a mihring dikna chanvo humhalhtu, Espoir Muhinuka chuan indona chu a tawp mai dawn lo nia sawiin Trump-a chu a taka inkahhai a awm theihna tura hma la turin a ngen.
North Kivo province-a mipui telna pawla an president, John Banyene-a chuan miin muanna a awm theih an beiseina a tlem hle tawh tih a sawi bawk.
“Inthahna, tlanchhiat leh inbeihna a la awm reng a, hrehawm takin kan la awm reng a ni,” a ti.