Trump-a’n inthlan a chuh leh lo vang tih sawi thei lo
US President Donald Trump-a chuan a term thum nana White House chuh leh a tum lo vang tih a sawi thei lo va, ‘nuam a ti’ tih a sawi.
Amah thlawptu thenkhatin an ram danpuiin term thum president nih a phalsak loh avanga kum 2028 inthlanah chuan vice president chuh tur anga an sawina erawh a nih loh thu a sawi.
Asia-a a zin meknaa thuthar lakhawmtuten an kawmnaah Trump-a chuan vice president chuh tur anga ngaihdan lo awm chu ‘a tha reuh’ tia sawiin, ‘a dik lo vang’ a ti zui.
A vawi thum nana president chuh leh tur hian eng ang hmanrua nge a hman dawn tih a hriat lo va. Kar hmasa khan a strategist Steve Bannon-a chuan kum 79 mi hi a president leh theihna turin ‘ruahmanna’ an nei tawh tih a sawi thung.
Malaysia atanga Japan pana Air Force One-a a chuan laiin Trump-a hian danin vice president chuh turin phalsak mah se chutiang ruahmanna a nei lo tih a sawi.
“Mipuite pawhin an duh lo vang. He ngaihdan hi a tha reuh khawp mai a; mahse, a dik ka ring lo,” a ti.
A term thumna chuh leh chungchangah Trump-a chuan, “Ka la ngaihtuah miah lo va; mahse, tunah hian inthlana tling tura ka dinhmun that lai ber a ni,” a ti.
Trump-a hian a vice-president, JD Vance leh Secretary of State Marco Rubio chu amah thlaktu ni thei tur nia sawiin, ‘dan theih loh’ an nih thu a sawi.
US danpui 22nd amendment chuan tumah term thum president ni thei lo turin a ti tawh.
He dan hi tidanglam tur chuan an ram rorelna in hnih, House of Representatives leh Senate-a hmun thuma thena hmun hnihin an duh emaw, state lagislature hmun thuma thena hmun hnihin constitutional convention an kohva an pawm a ngai a, hei hi thil thleng thei a nih a rinawm chiah lo.
Kar hmasa khan Trump-a adviser thin, tun thlenga amah la tan em emtu, Bannon-a chuan president vawi thum nih theih nan ruahmanna an nei tih a sawi.
“Trump-a hi kum 2028-ah president ni leh turin hma kan la a, a hunah kan ruahmanna chu kan puang ang,” tiin The Economist a hrilh.
March thla khan Trump-a hian CNBC hnenah ‘a chuh tawh lo mai thei’ tih a lo sawi tawh a, a hnuah chuh leh tura sawina chu ‘fiamthu a ni lo’ tih a sawi leh bawk.
Democrats chuan tu nge kum 2028-ah an dintir dawn a la chiang lo va, mi eng emaw zat chuan chuh theitu nih tumin an ngaihven tih erawh a hriat.
Pathianni khan California Governor Gavin Newsom-a chuan CBS hnenah president nih chu a ngaihtuah tak tak lo tia a sawi chuan ‘dawt a sawi’ a nih tur thu a sawi.
Vice-president hlui, Kamala Harris-i pawhin BBC hnenah chuh leh a tum mai theih thu leh nakinah chuan president a la nih theih thu a sawi tawh bawk.
Trump-a’n inthlan a chuh leh lo vang tih sawi thei lo
