US President Donald Trump chuan, candidate atana an puan chian hnuah a Republican puite chu kumin November inthlanna chu Democrats te chuan an ‘ruksak’ mai theih thu a sawi.
“American mipuite bum nan Covid an hmang a ni” tiin Trump chuan North Carolina a party convention neihnaah a sawi.
Trump chuan a hma pawhin mail-in ballots a duh loh thu tum tam sawi tawhin inbumna a awm theih thu a tlangaupui nasa a. Trump hian opinion poll lakah Democratic challenger Joe Biden a pha lo zel thung bawk.
Trump chuan Democrats te chu ‘Covid remchanga hmanga inthlan ruksak tum’ ah a puh a. “He inthlan min chhuhsak theihna awm chhun chu an rigged chauhin a ni,” tia sawiin, “Kan chak dawn,” tiin a sawi.
Trump hian kum 2016 pawh khan poll-ah Hillary Clinton a phak loh laiin ‘rigged’ election hi a lo aupui tawh bawk.
Official-a Republican nominee-a puan a nih tumin amah thlawptute chuan Trump chu ‘kum li dang’ tiin an au a. “Che thei lova siam in duh chuan kum 12 dang ti rawh u,” tiin a lo chhang let thung a.
US constitution 22nd Amendment kum 1951 a pawm chuan US president te chu term hnih chauh, kum riat chhung chauh office an luah a phal a ni.
Mail-in ballot a him em?
Trump chuan mail-in voting – kuminah coronavirus pandemic avanga nasa zawka kalpui a nih rin uar lutuk chuan US history a inthlana corrupt ber a thlen theih thu a sawi tawh a.
Mahse, voter fraud a thlen dawn tih finfiahna emaw chumi tichiangtu tur thil a tlem hle thunga ngaih a ni.
Ellen Weintraub, commissioner of the Federal Election Commission chuan, “Mail hmanga vote thlakin inbumna a thlen dawn tih conspiracy theory rintlakna a awm tak tak lo,” tiin a sawi a.
Mail-in voting hi US miliatry te chuan an hman tlanglawn niin Trump leh a chhungte pawhin an hman thin tho a ni thung.
Mahse, US postal system-in inrenchemna kalpuia mail a hun taka an thlen theih loh fo avangin ballots te chuan inthlan ni ah state officials te hnen a thlen hman loh rinna a lian thung.
New York City chuan June thla khan mail voting hmanga inthlan an kalpuinaah kar hnih hnuah result an puang thei chauh a.
New Jersey-ah pawh mail-in election-ah voter fraud a awm tih finfiah avangin an inthlan that phah tawh bawk a, mi pali an man phah bawk. Hei tak hi Trump an behchhana a hman chu nia sawi a ni bawk.
(THE AIZAWL POST – Rampawn)
Full>> ePaper Subscribe
