President Donald Trump chuan Supreme Court judge a thlan avangin kum 1973-a US in nautihtlak a remtihna dan a kalpui chu ennawn leh theih a nih theih thu a sawi.
Trump chuan Supreme Court judge atana a thlan dawna inkawmna an neihah Amy Coney Barrett nen abortion rights an sawi dun loh thu a sawi a. Mahse ‘a ngaihdan a conservative tih kan hresa a ni’ tiin a sawi.
Coney Barrett hi liberal Justice Ruth Bader Ginsburg thlaktu tur a ni a, mahse, Senate in an pawm a la ngai thung.
Democrat leh women’s rights advocate te chuan Judge Barrett, conservative jurist chuan kum 1973 a nautihtlak remtihna judgement Roe v Wade tia hriat lar paih turin pawimawhna thuk tak a neiah an ngai a, an hlauthawng hle a ni.
Judge Barrett nomination hi Senate-in a pawm a nih chuan conservative awn judge ten Supreme Court ah liberal te chu 6-3 majority laiin an tma hneh dawn a, hei hian kum tam tak a daih dawn bawk a, a chhan chu Supreme Court judge te chu damchhung atan a nih vang a ni.
Trump chuan, “Constitution a inziah dan anga sawifiaha kalpui thei ka zawng a, chuti lamah chuan mi chak tak a ni,” tiin Barrett chungchang a sawi.
Judge Barrett hi Trump-a’n Supreme Court judge pathum a ruatna ni tawhin kum 2017 khan Neil Gorsuch leh kum 2018 ah Brett Kavanaugh te a lo ruat tawh bawk a ni.
Abortion issue hi Gorsuch leh Kavanaugh te confimration hearing neihah thu chai berah a lo tel tawh bawk a. He mi hnu hian conservative states thenkhatte chuan nau tihtlakah dan khauh zawk an kalpui der tawh a, hei hi a reiah chuan Supreme Court-a la ngaihtuah tur a ni dawn a ni.
Eng nge Roe v Wade, eng vanga pawimawh nge?
Roe v Wade hi kum 1973 a inkhinna US a nautihtlak remtih takna a ni.
Supreme Court justice te chuan sorkarin nau tihtlak khap turin thuneihna a tlachham tia sawiin 7-2 in nautihtlak remtihah vote thlak niin hman a ni zui ta a ni.
Court-in thutlukna a siam behchhan ber chu hmeichhia chuan a naupai titla turin a duhthlanna zalen takin a hmang thei a, chu chu 14th Amendment of the US Constitution-in a humhimsak tlat an ti.
He thutlukna hi kum 25 a upa Norma McCorvey in hming lem ‘Jane Roe’ hmanga Texas state a nautihthlak chu nu nunna atana derthawng a nih loh chuan khap bur leh dan bawhchhiatna tih chu a khin vang a ni.
Texas Attorney General anti-abortion law tan tlattu chu Henry Wade a ni thung a. 22 January 1973 a Supreme Court thutlukna siam kha America a court thutlukna sawizui hlawh ber a la ni ta renga ngaih a ni.
(THE AIZAWL POST – Rampawn)
Full>> ePaper Subscribe
