Daily Newspaper

Trump impeachment kalpui zel dawn

14

US Senate chuan President hlui Donald Trump impeachment chuan constitution a kalh lo tiin kalpui zel turin thutlukna a siam a.

Trump defence team te chuan White House chhuahsan tawh a nih avangin impeachment hmachhawn thei a ni tawh lo tiin an tang a ni.

Mahse impeachment kalpui zel tur leh tur lohah vote lak niin 56-44 in kalpui zel duhtu an tam zawk a, heng zingah hian Republican thenkhat an tel bawk.

Trump hi thla kaltaa Capitol suasamna thlengah ‘helna fuihpawrh’ tu tia puh a ni a. Mi sang tam tak te chu US presidential election-ah thil fel lo a awm avangin Trump-a’n a chak loh phah tiin an lungawi lo an pungkhawm a ni.

Democrats te chuan Senate a ngaihtuahna neihah Trump-an January ni 6-a thusawina a neih video chu pholangin chu chu amah thlawptu tena buaina an siam tanna bul tiin an sawi a.

“Dan bawhchhiatna leh awmthat lohna a ni,” tiin Representative Jamie Raskin, Maryland chuan sawiin, “Hei hi impeach na tling lo a nih chuan a tling a awm lovang,” tiin a sawi bawk.

President hlui Trump lawyers te chuan president hlui White House chhuahsan tawh impeach tum chu constitution kalh a ni tia sawiin Democrats te chu politics thila chetlaah an puh a. 56-44 a kalpui duhtu an awm takah chuan Republicans paruk ten Democrats te an thlawp tihna a ni bawk.

Mahse, Trump thiamloh chantir tur chuan Senate-ah hmun thuma thena hmun hnihin an thlawp a ngai a. Chu chu thleng lo tura ngaih ni thungin Republican tam zawk te chuan Trump an la thlawp tih a lang a ni. Thiamloh chantir ni se chuan Trump chu inthlana chuh thei tawh lova siam a ni thung ang.

Tihian pawl pahnihte chuan an tanna phochhuak turin darkar 16 vel ve ve hun an nei dawn a. Nimin atang khan chhunzawm nghal niin tunkar chhung chu a awh tura ngaih a ni a. Zawhna inzawt tawnin hun an hmang dawn a ni.

Impeachment manager te chuan ngaihtuah hun chhung tisei turin thuhretu emaw te koh tur leh tur lohah thutlukna an la siam lo thung.

Pawl pahniha lawmaker te chuan a rang thei ang bera chinfel an duh ve ve a, a chhan chu President Joe Biden a coronavirus package pawm a ngaih vang a ni.

Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy