Donald Trump leh Kamala Harris te chuan November thlaa presidential election atan adebate hmasa ber an neihah an inbei na hle.
Minute 90 chhung zet Philadelphia a debate an neihah mimal takin abortion, immigration leh foreign policy chungchangah te an inbei na hle a.
‘Nice to see you’
Debate tura dawhsan atanga an chhuah pahin Harris chuan Trump-an podium a pan laiin a va pan a.
“Kamala Harris” tia insawiin a tum khat nana hmaichhana an inhmuhnaah chibai tumin a kut a pechhuak a, “Debate tha tak nei ang aw” a ti zui.
“Nice to see you. Have fun” tiin Republican president chuan a chhang let a. Tun hi kum riat chunga presidential debate neiha inchibai thlen hmasak ber a ni bawk.
Harris chuan debate chhungin hun tam zawk chu Trump direct taka en rengin a changin a ner khum a, a nuih khum bawk a, a changin Trump-an zawhna a chhan laiin awih hmelloh fahranin a lu a lo thin khum bawk.
Trump erawhin Harris thusawi laiin amah a en kal thung a, a changin a lu a lo thin khum ve bawk.
Ka sawi mek e
Vice-President Harris, Democrat ni bawk chuan a tir phat atangin offensive-a chein Republican candidate Trump chu hawlh buai nghal tumin a criminal trials leh Covid-19 pandemic kaihhnawihah te a chhaih nghal a.
Trump thung chuan inflation leh immigration lam chu sawi lui talhin Harris chaklohna lamah keuh a tum ngar thung a, Biden-Harris administration chuan ram an tichhia tia sawiin Harris chu ‘Marxist’ tiin a sawi bawk.
Harris chuan Trump rally ah mi tlemte chauh an kal thin tia nuihsawhin, “Mipui ten a a rally an rauhsan zel a chhan chu an ning a ni,” tiin a sawi a.
Trump chuan chhang letin, “Harris rally ah mipui an kal ve ngai lo, kalna chhan tur a awm tlat lo” a ti ve thung.
Harris chuan Trump thusawi lai a tihbuai hnuah Trump chuan, “Ka sawi mek a. Chu chu i hrethiam em?” tia zilh letin chu chu kum 2020 vice-presidential debate Mike Pence nena an neiha Harris lo chet tawh dan kahsak nan a hmang zui a ni.
A hnuah pawh Harris-in tawng luih zel hnuah Trump chuan ‘quite please’ a tih khum bawk a.
|um khat chu Harris in Trump chu dictator te faktu tia sawiin a sawisel a, Trump chuan Joe Biden US president ni mek chuan Harris chu a duh lo tia sawiin, “A ngaina hauh lo, a ti hleithei lo” a ti bawk.
Trump chuan July thlaa silai hmanga kahhlum tuma beih a nihnaah Democratic te chu dem bawkin, “Ka chungchang an sawi duh dan avanga silaimu dawng ka ni” tiin a sawi bawk.
Uisa an ei
Debate neih hma lawk darkarah social media chu finfiahna awm lo report a khatin- Trump running mate JD Vane chuan Haitian migrants te Springfield, Ohio a awm te chuan ui ru bovin a sa an ei tiin a sawi tia tarlan a ni a.
City officials te chuan he puhna hi finfiahna engmah a awm lo an ti chungin debate neihnaah Trump chuan he mi chungchang hi a sawi lang tho va.
“Ui sa an ei a, zawhte sa pawh an ei a, mihringte chenpui pet te sa an ei a, a zahthlak a ni” tiin a sawi a.
Abortion
Harris-in Trump a beihna na ber ber chu kum 2022-a US Supreme Court-in abortion chungchang constitutional rights a overturned kaihhnawihah a ni a, democrats tena thupui ber pakhata an neih a ni.
“Sorkar thupek zawm turin mi tumahin an sakhua emaw rinna emaw an kalsan a ngai a. Donald Trump hian hmeichhiate an taksa thuah engmah an tih tur leh tih loh tur hrilh tur a ni lo” tiin Harris chuan a sawi a.
Harris chuan Trump chu thlan tlin a nih leh ngat chuan nau tihtlak khapna thupek a siam ngei ngei ang tiin a sawi bawk a.
Trump thung chuan chu issue chu political liability thil a ni tia sawin, “A thusawi hi dawt muhlum a ni a. Abortion ban hi ka duh lo” a ti thung a. Trump chuan nautihtlak chu pawngsual, incest emaw nu nunna tana a derthawn angah te tih loh chuan a thlawp lo tiin a sawi thung a.
Policy?
Trump chuan Harris-in policy a nei lo tia sawiin ama idea ngei te chu campaign trial neihnaah copy-ah puhin Trump chuan Harris hnenah ‘maga hat’ pawh a thawn tur thu sawiin President Biden nena an danglamna a awm dawn lo, a ti bawk a.
“Policy a nei lo. In hriatreng tur chu amah hi Biden a ni” tiin a sawi a. Chu chu chhangletin Harris chuan, “Joe Biden ka ni lo chiang mai” a ti ve thung.
Obamacare nuaibo tuma a president laia hma la tawh Trump chuan engtiangin nge Affordable Care Act chu a thlak ang tia zawhna chu ‘ruahmanna an nei fel tawh’ tia sawiin thlan tlin a nih chuan Affordable Care Act aia tha daih an kalpui ang a ti bawk.
Economy chungchang bik opinion poll a Trump a chungnun zawkna chungchangah Harris chuan ‘ruahmanna ka nei’ tiin a sawi chamchi bawk a.
Harris chu radical liberal anga chhuahin Trump chuan, “Police te nuaibo turin plan a nei a. Silai zawng zawng lakhawma tung turin plan a nei a. Pennsylvania leh hmun dang dangah fracking tihtawp a tum bawk” tiin a sawi a.
Democrats presidential nominee Kamala Harris chuan Trump puhna chu a hnawl thu sawiin amah ngei pawhin silai a nei lo a ti bawk.