Daily Newspaper

Tualchhung journalist leh phai lam journalist te inkawm

8

Mizoram leh Assam ramri buaina a hmuna thil awmdan hrechiang tura rawn kal, phai lam journalist thenkhat leh Mizoram Journalists’ Association member-te chuan vawiin, August 4 khan Aizawl Press Club an tlawh a. State chhung chanchin thar inhrilh tawnna kawnga thawh hona leh inpawhna tha zawk a awm theih na tura tul leh pawimawh an tih te an sawi ho.

Inkawmkhawmna hi MJA Gen. Hqrs. president Pu Zonunsanga Khiangte chuan a kaihruai a, tunhnaia ramria thil thleng chungchanga thil thlen dan dik tak hrechiang tura a buzawl ngeia rawn luhchilh national media-te chu an lo lawm tih a sawi a. Mizoram chu ram kilkhawra awm a nih avangin a ram leh a chhunga chengte chanchin chu ram chhung hmun danga media lian zawkten an hrechiang tawk lo fo thin nia an hriatna chu tuna rawn kalte chuan an rawn thlak danglam ta nia an hriat thu a sawi.

Phai lam media lokal zinga a senior ber Subir Bhaumik (NDTV) chuan Mizoram chanchin leh thuthar awmte hriat zung zung theihna turin Mizo journalist-ten tan an lak deuh deuh a tul nia a hriat thu sawiin, thalai zawkte chu tuna an thlen chin duhtawk mai lo turin a fuih a, India ram chhung leh ram pawn thlenga journalist hriat hlawh nih tum turin a fuih.

CNN IBN reporter Amit Pandey chuan tun tum ramria thil thleng leh nidangah pawh, Mizoram kaihhnawih thil hriat duh an neihte state aiawh ni theia an ngaih an zawhten chhanna an pe tha ngam lo fo thin a, hei hian an duh angin report lai leh kimchang zawk an pek theih loh phah chang a awm tih a sawi.

Delhi atang chuan hmarchhak state leh state dang pawh, an hriat duh an hriatna awlsam leh rang ber chu state MP te an nih laiin, hmarchhak state MP tam zawk chu an thil duh hre turin biaktawng an har a, media hmachhawn an hreh tlangpui thin nia an hriat thu te an sawi bawk.

MJA member-te pawhin, India ram laili zawka chengten Mizoram chanchin, a tha lam te an tilang tlemin, an ngaihven tawk lo nia an hriat dan te an hrilh ve bawk a. Tun tum thil thleng pawh state pahnih police te inkahna a thleng leh nunna hial chan a nih tak avangin ngaihven loh theih loh a ni ta chauh nia an hmuh thu te an sawi a ni. National TV leh print media hrang hrang ten an aiawh news reporter rawn dah ve thei se an duh thu sawiin, chutiang mi tur Mizo thalai, mass communication leh a kaihhnawih zirchhuak an awm nual tawh thu te an lo hrilh a ni.

Tualchhung journalist te leh phai lam atanga rawn kal journalist-te hian tha zawka thawhho dan tur te, state hrang hranga journalist-te an inpawh tlan lehzual theih dan tur nia an hriat te an sawiho bawk.

Ramri buai kaihhnawiha rawn kal phai lam media tam zawk hi naktuk hian an haw dawn a, thenkhat rawn luh belh an awm laiin ramri lama chambang mekte pawh an awm a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy