Tualchhung zikhlum an hralh
theihnan phai zikhlum dan a tul
Mizorama zikhlum chingtuten an hralh that theihnan state sawrkarin dan a neih sa hmanga phai zikhlum lo lut tur dan a ngai tih Congress party chuan an sawi.
MPCC Legal Department chairman TT Zothansanga chuan, Mizorama thlai thartu loneitute chu thlai lama sumdawng, market competitor-ten an rahbehna lak atanga humhim a, state pawna sawrkar hriatpui loha a liam thin chu ven a ngai tih hria in, “The Mizoram Agricultural Produces (Restriction on Movement) Order 1994” chu Congress sawrkar laiin gazette-a chhuah tih a sawi.
“He order hian a hun laia thlai ngaihtuah ngai bik – iskut, hmarcha, sawhthing, chhawhchhi leh la (raw cotton) a huam a. Sawrkar hriatpui loha ram pawna hralh a remti lo. A chhan chu, hnamdang sumdawng experience ngah tawh lutukten an lo bum a hlauhawm a, sawrkarin permit mumal taka a siam hnuaiah hralh theih a ni. Mizorama chengten kg.50 chin eichawp atan vawikhata ken theih a ni a, zin veivakten an bungraw zingah kg.10 aia rit lo an keng thei a ni,” a ti.
Changtlung zawkin amendment hmangin dan hmasa chu kum 1999 ah tihdanglam niin, dan tharah hi chuan ram pawn atanga thlai lo lut sawrkarin a duh anga a lo control theihna a tel thung a, checkgate pawh Vairengte, Bairabi leh Kanhmunah siamin, a tulna hmuna siam belh zel theih a ni tih a sawi bawk.
2023 MLA inthlan dawnah ZPM chuan an manifesto-ah state pawna thawn chhuah chi leh state chhunga eiral tur chin a, intodelh tura hma lak a ni ang, tia thlai an sawi zingah zikhlum a tel a; heng thlai hi a rate fel tak sawrkarin a siam lawk anga, a tul ang zelin a chi pawh a ngaihtuahpui ang, tia a dah laiin, rate siam lawk a ni loa, a chi hi sawrkarin a ngaihtuah pui lo tih TT Zothansanga hian a sawi.
Tunhnaiah Samthang khua in zikhlum hralhna an hriat loh avangin quintal 1300 vel a tawihral tawh a, leitha atan tia sam chiam pawh an awm tih sawiin, Aizawl lamah YMA branch hrang hrangin quintal 350 vel an lo tih ral sak tawh tih a sawi a. “YMA kaichhana sawm tul khawpa loneitute manganna ang hi Mizorama la awm ngai lo a ni,” a ti.
Samthang chauh ni lo, Khankawn leh East Tuipui bial khaw dangah zikhlum hralh tur an la ngah hle a, sawrkar hotu lam pawh an dawr tawh a, chief minister-in Trade & Commerce director hnenah phai lam zikhlum a tlem thei ang ber luhtir tura a tih thu hriat bak chu hmalakna liantham a la awm lo tih MPCC hruaitu hian a sawi.
“The Mizoram Agriculture Products (Prohibition of Movement)(Amendment) Order 1999 hmangin sawrkar hian loneitute leh zikhlum zuartute nen inberawnin order siam se, tawngkama rawn lut tlem tura director leh duty-te kuta dah mai loin, Vairengte leh hmun hrang hrang atanga zikhlum lo lut tur khapna dan chhuah se, thingtlang loneituten an hralh ve thei tawh anga, an thawhrim rah a takin an seng thei dawn a ni,” a ti.
Tualchhung zikhlum an hralhtheihnan phai zikhlum dan a tul
