Engemaw lai atang khan zu man tur a pung niin a lang, tualchhung zu pawh, a sen chi pawh, man zat a pung thur thur mai.
Mizoram Excise & Narcotics (MEN) department-in kuminah tualchhung zu hi July ni 31 thleng khan litre 37,973.790 an man a, kumina an man hi a tam tham hle.
Tun hnai kum hnih kum thum vel chhungin tualchhung zu hi a pung nge ni dawn, an man zat a pung nasa. 2020-ah khan litre 46,083.762 an man a, 2021-ah litre 40,334.032 an man. Kumin thla sarih chhunga an manin a hnaih tawh viau.
2022-ah an man zat hi a pung hluai a, litre 75,701.595 an man. 2023-ah a pung leh a, litre 81,221.885 lai an man. Kumina an man zat enin tualchhung zu man zat hi a hluar niin a lang.
July thla thleng khan a sen chi IMFL (750 ml) um 10,676 an man tawh a, 375 ml pawh um 1,369 an man tawh.
Nikum kum tluan khan IMFL (750 ml) hi um 20516 an man a, 2022 khan um 17103, 2021 khan um 15329 an man. Heng nena khaikhin hian kumin thla sarih chhunga an man hi a tlem lo.
Kuminah July thla thlengin zu bilh lai tin 72,836 an man a, nikum khan tin 194763, 2022-ah tin 131649 an man.
Zu hi a zalen telh telh nia sawi a ni a, a duh tan chuan zu hi hmuh tur a awm reng nia ngaih a ni.
Tualchhung zu leh a sen chi man tur pung
