Tualte chuan tomato sawngbawlna hmun tur, Tomato Processing Unit an nei thar a, Thawhlehni khan deputy chief minister Tawnluia’n a hawng.
Tualte khuain eizawnna atan tomato an hmang thei chu a lawmpui tih deputy chief minister hian a sawi a. Bazara zawrh mai piahlamah tomato sawngbawl theih a ni tur leh vawnthat a ni tawh tur chu thil lawmawm tak a ni tih a sawi a ni.
Sialhawkah Pineapple Processing Plant din tura hma lak mek a nih thu te, Chawngtlai leh Khawhaiah sapthei ching tura ruahman a nih thu leh cheng nuai 30 man chuang sapthei zamna thirzai sem a nih tawh thu te a sawi a ni.
Khawzawl DHO Lalnunpuia sawi danin, Tomato Processing Unit hi SEDP sum, nuai 50 hmangin kumin April 21 khan a hmun laih hna thawh tan a ni a. Tomato sawngbawlna khawl ‘Tomato Ketchup Line’ hi cheng nuai 40 man niin, FOCUS (IFAD) hnuai atanga lei a ni. A bunna building sirah hian ‘Boiler House’ din a ni bawk. Khawl hian darkar khatah tomato kg 100 sawngbawl thei tura ngaih a ni. Processing Unit tinung tur hian SEDP sum nuai 7.9 hmangin 11kv line meter 500-a sei pawtin, 63 kVA a chak transformer bun a ni a; helai hmunah vek hian tomato vawnthatna tur ni zung chakna hmang, cold storage metric tonne 10 dawl zo, RKVY hnuai atanga siam greenhouse cluster square meter 500-a zau leh litre 50000 dawng tui dahkhawlna bun tel a ni.
Tualte hian kum 2019 atang khan tomato an ching tan a, tunah tomato variety chi hnih – Arka Samrat leh Arka Abhed chingin, chhungkua 200 chuangin eizawnna’n an hmang mek. Kuminah September thleng khan cheng nuai 200 man tomato an hralh chhuak tawh a; kum 2019-2023 chhung hian tomato atangin cheng nuai 1193 chuang an lalut tawh a ni.
Tualte-in tomato sawngbawlna nei thar
