Tualthattu nia hriat man

Serchhipa tualthahnaa pawikhawihtu nia rin mi pakhat chu May 17 khan Aizawlah man a ni.
May 16 zinga Serchhip Bukpui leh Chhiahtlang Chhim Veng inkar kawngthlanga a ruang hmuh Lalsangzuala (31), Mission Vengthlang Aizawl thihna chungchangah, pawikhawihtu niawma rinhlelh theih chhuibing neiin, Special Investigation Team chuan Nilaini khan he mi hi Aizawl lamah an umzui a, an man zui a ni.
Rnhlelh man hi Laldinthara (42), Khawruhlian Vengchung a ni a. Pawikhawihna tenau dangah pawh lo inhnamhnawih tawh thin, police record-a chuang a ni a, tunhnai maiah pawh Serchhip Police-in manin, thubuai siamsak a ni lo thung.
Thudawn danin, Thawhlehni zing khan Laldinthara hian Aizawl pan tur maxi cab chu Chhiahtlang leh Lamchhip inkar ram palailengah lo pharin Aizawl a pan a, a khawsa ziaah rinhlelh a kai hle nia sawi a ni. Rinhlelh a kai chhan thenkhat zingah, restaurant-a a thil einaah a thil ei man pek tumin sumfai a kawl hnem hle niin a lang a, a pawisa ah hi hmuh hlau hle angin a awm thung si a, amah enin sumfai thahnem tak a kawl nia lang chuan rinhlelh a kai a; a awmdan hrim hrimah hlauhthawn nei a ang hle nia sawi a ni bawk. Rinhlelh chhuibing a nih hnu ah a pheikhawk bun chu, tualthi ta Lalsangzuala ta ang chiah a bun tih finfiah leh a ni a, a pheikhawk a bunsak nia ngaih theih a ni.
Nilaini tlai hian police hmaah a inpuang nghal nia sawi ni mah se, he chanchin buatsaih lai hi chuan police-te hian thu chiang zawt hriat tumin thu an la zawtfiah a. Midang inhnamhnawih an awm leh awm lohte chhuizui a ni.
Serchhip atanga thudawn danin Lalsangzuala hian a hnathawhna leh a lirthei hmansaktu NHIDCL atangin bill a la nia sawi a ni bawk.