Site icon The Aizawl Post

Tualthattua puh man tawh

Pathianni chawhnua Aizawla tualthahna thlenga pawikhawihtua puh chu a tlanbo hnu ah Thawhtanni khan Bilkhawthlir daiah man a ni.
Thudawn danin, March 5 chawhnu khan Ginkhansiama (33), Ainawn Veng Aizawla khawsa mek chu chemtea vihhlum a ni a, pawikhawihtua puh Lalawmpuia (24) Ainawn Veng tho chu tlanbo nghalin, police-ten an zawng a. March 6 chawhma dar 11.00 vel khan Bilkhawthlir leh Buhchangphai inkar Phaipheng Zauah Bilkhawthlir Tuithaveng YMA-ten nangchingin an um a, a hnu ah an man zui a, Bilkhawthlir Police Station-ah hlan nghal a ni.
Tualthahna thlen chhan nia sawi chu, Lalawmpuia hi an thenawmpa Ginkhansiama nen hian zawhte an invulh tawm a, hemi chungchangah hian inhnialbuaiin, chawhmeh channa chemte in a vit ta mai niin a sawi.
Nunna chan ta Ginkhansiama hi Kolasib district-a North Hlimen khaw mi niin, eizawnna avangin Aizawl Ainawn Vengah a nupui fanaute nen a khawsa a, a ruang hi North Hlimenah lak a ni.

Exit mobile version