Mamit district Bungthuam khua ami Lalfakmawia (59) tualthihna chungchangah mawhphurtua puhte police-in an man belh zel.
2025 Feburary 13 khan Lalfakmawia hi Bungthuam leh Luimawi inkar lei bulah a ruang hmuh a ni a, a lu hmun li velah hliam awmin, a nghawngah gamcha nghet takin a insuih a, t shirt leh kekawrte chauh a inbel tih sawi a ni. Hemi hnu hian a ruang hmuhna atanga hla tham fu, Thinghlun kalkawngah a thawmhnaw dang leh a bike hmuh a ni bawk.
Kawrthah Police Station-ah thubuai ziahluh a ni a, police-ten an chhuizuinaah nunna chan Lalfakmawia nupui Sumdawngrungi bakah midang pahnih chu February 18 khan man an ni a. February 20 khan pawikhawihnaa tel nia sawi pakhat dang man leh niin, man tur dang pawh an la awm tih thu dawn a ni.
Tuna police-in an man zingah hian Lalfakmawia nupui laizawn fapa leh Lalfakmawia thianpa pawh an tel a. A muhil lai an that nia sawi niin, auto rickshaw hmangin a ruang hmuhnaah hian an va dah bakah a bike leh thawmhnaw dang pawh a hnua an hmuhnaah hian an dah niin police hmaah an insawi.
He thila inhnamhnawih ve nia sawi, Tripura lam mi Bru pakhat pawh man leh niin, a ni hi Bungthuamah mi ina thleng a ni.
Tualthihna thlen chhan tak hi police lam chuan an la sawichiang loa, tualthi ber hi an khua – Bungthuamah ZPM hruaitu niin, kumi February 12 zan dar 10.00 vel khan vote chhiarnaa kal tumin a chhuak niin a nupui hian a lo sawi tawh a. A rawn haw tak loh thu leh zawnpui tura ngenna hi a tuk – February 13 khan a nupui hian an khaw YMA hruaitute a hriattir a ni.
YMA-in zawn dan tur an ruahman mek lai, February 13 chawhnu dar 3.00 velah a ruang an hmuhna luitea kalte hian ruang hi an hmuh thu hriat a ni ta a ni. Ruang an hmuhna hi Bungthuam atangin km.3 vela hla a ni.
Tualthih thua mawhphurtua puhte man
