Daily Newspaper

Tui chhunga Rubik’s cube remdik record a siam

12

Chennai a cheng Illayaram Sekar, kum 25, chuan thawkna tur hmanrua engmah hmang lo a tui chhunga in hnim pil chunga Rubik’s cube remdik hnem thei record a siam a, paruk a rem dik thei.

Illayaram Sekar hian darthlalang a siam tui dah theihna bawm-ah vawi khat chiah thawk lain, tui chhungah a inhnim pil a, tichuan minute hnih leh second 17 chhungin Rubik’s cube paruk a rem dik hman a, record a siam ta a ni.

Record siam tum hian a inbuatsaihna a rei tawh hle a, kum hnih vel kalta atang khan tui chhunga awm rei theih tumin a lo inzir nasa tawh hle a ni. Amah hi Guinness World Records-ah pawh a mikhual tawh vak bik lo a, 2016 khan thirsakawr khalh chungin darkar 6 leh minute 19 chhunga Rubik’s cube 700 remdik theiin record a lo siam tawh a, hei bakah hian Kaligi Ranganathan Montford School, Chennai a zirlai 3,997 te chu Rubik’s cube remdik zirtirin, a huhova Rubik’s cube remdik tam ber record an lo siam tawh bawk.

Sekar hian 2013 atangin Rubik’s cube a tuipui ve tan chauh niin a sawi a, “Vawi khat ka remdik atang khan YouTube-ah video te enin ka inzir ta tluk tluk mai a ni,” a ti. College-ah Rubik’s cube remdik intihsiaka a tel hmasak ber tumin first round-ah a tla nghal a, a kum lehah a tel nawn leh a, chutah chuan pakhatna a ni ta.

Sekar hian record dang pawh a siam leh maiin a rinawm a, a letling zawnga inkhai chungin minute 26 chhungin Rubik’s cube 72 a remdik hman a, hei pawh hi Guinness lamah record a siam theih leh theih loh hrechiang turin document te a thawn leh mek a ni.

(THE AIZAWL POST – Phuah Pawlh)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy