Site icon The Aizawl Post

Tui hlut nachang kan hre lo

Mihring finna hi a sang tawh hle kan tih laiin nunna hnar pawimawh ber Tui erawh tun thlengin mithiam ten an la siam chhuak thei lo. Tui chemical formula chu H2O a ni tih leh, tui hi hydrogen atom pahnih leh oxygen atom pakhat inbelhbawm a ni tih an hria, mahse hydrogen leh oxygen chawhpawlh ve ngawt chu puakthei a ni mai.
Tui siam chhuak thei si lo hian tui pawimawhna hi kan hrethiam thei lo a, hei hi mithiamte chuan ngai pawimawhin mi tinin tui ngaih pawimawh leh hlut nachang kan hriat theih nan kum 30 kalta atang khan UN chuan kum tin March ni 22 hi World Water Day atan a lo hmang ta a. Mizoram pawhin he Ni hi urhsun takin kan hmang ve thin a; mahse, a Ni chiah hi kan ngai pawimawh a nih hmel a, tui erawh kan hlut lo thin hle.
Tui kan hlut lohzia chu, ramngaw chereu avanga tuihna lo kiam chho mek hian a entir chiang ber ang a. Chumi dawtah chuan, kan lui tui tlan laite kan tihbawlhhlawh nasat theihzia atang hian tui kan hlut lo hle tih a lang thei bawk.
Tui hlut nachang hre turin kan infuih a, tuihna humhalh turin kan inhrilh a, a thu chuan thahnem kan ngai thei khawp mai; mahse, a thua kan sawi kalh zawng (opposite) vekin a practical-in kan khawsa zui leh si. Chu chu eng nge ni kan tih chuan, tuihna siamtu ber ramngaw kum tin thiat zawnga eizawnna kan la kalpui hi a ni, kan ti thei ang.
Khawi khua khua emaw ni chuan tuihna humhalh that avangin Award eng eng emaw te chu an lo dawng a ni thei e, hei hi a lawmawm em em, chutih laiin a lehlamah, thingtlang loneih avangin tuihna humhalhna atana kan thingphun let sang tam tak kan vat thluin kan hal kang dur dur reng a. Heng zawng zawng hi tui hlut nachang kan hriat loh vang a ni.
Chaw tel lovin mihring hi chawlhkar hnih khat te chu a dam thei a, mahse tui tel lo chuan ni li aia rei a dam theih loh, mithiamten an ti.
Heti khawpa mihring nunna atana pawimawh Tui hi hlut nachang hre turin inzirtir thar leh ila, ram hruaitute pawhin tuihna tikang zawnga eizawnna bansan thei turin hma la bawk teh se.

Exit mobile version