World Water Day 2024 denchhenin Zirtawpni khan Public Health Engineering Department leh Central YMA tangdun buatsaihin Aizawlah hun hman a ni a. Kumin thupui atan ‘Inremna’n tui’ (Water for Peace) tih thlan a ni.Hmanpuitu PHE secretary Er Lalhmingliani Hmar chuan tui chu mitin mamawh a nih angin, chakkhai atana kan hmanna chi hrang hrangah, khawvel changkang zelin kan mamawhna a ti tam zel a, tui duhkhawp hman tur kan nei lo chho tan dawna a lan avangin kan hmanna hrang hrangah innghirnghona awm thei laka ta inhriatthiamna nen inrem taka kan awm tlan a ngai tih a sawi a ni.
World Water Day lawmnaah hian chawimawina leh intihsiakna buatsaih lawmman sem a ni a. Tuihna humhalh kawnga mimal thawk tha mi pali – C Lalngaihsaki, Thaizawl (Lunglei district); H Lalramnghaka, Lamchhip (Aizawl district), R Lallianzela, Kepran (Aizawl district) bakah Pachhunga, Thiak (Aizawl district) te chawimawina hlan an ni.
Hei bakah hian Mizoram pum huapa WATSAN Committee thawk tha thlanchhuah niin, Mualthuam ‘N’ WATSAN Committee chu titha ber a ni a, pahnihna Chhuanthar Tlangnuam WATSAN Committee, pathumna Buarpui WATSAN Committee leh Vanchengte WATSAN Committee an ni.
Water Day denchhen hian district khawpui hrang hrangah pawh programme hman a ni a. Mipui nawlpui tan intihsiakna – a huhoa hnawmhnawk thiana intihsiak – social media challenge, lemziak intihsiak, one page comic design, jingle siam leh sms slogan inziahsiakte buatsaih a ni.
Kum 1992 atang khan United Nations General Assembly chuan khawvelah tui duh khawp leh thianghlim a awm zel theih nan, tui awmsate venhim a, awmze nei taka hman a tul zia leh chumi kawnga mi zawng zawng kan thawh ho theihna atan March 22 hi World Water Day atan a ruat a, kum 1993 atang khan tui pawimawhna pho chhuak thei thupui thlang chhuakin hman thin a ni. Mizoramah chuan kum 2012 atang khan hman tan a ni.
Tui pawimawhna inzirtirin World Water Day hmang
