Tui an pump thei lo ngun bawk a, thla khat chhunga an pump loh hun chhung pawh a rei lo thei lo. Chuti a nih chuan tui pump chhuah zat pawh a tlem tur a ni. Tlawng a nu!
Aizawl mipui tui tlan Tlawng lui a nu a, tui a nut avangin PHE department-in an pump thei lo ngun ta. Nikum khan a nut avangin an pump thei lo fo a, kuminah a zual emaw tih tur a ni.
PHE department-in an chhinchhiah danin, July thla chhunga Greater Aizawl Water Supply Scheme (GAWSS) Phase I leh II hnuaia tui an pump theih loh hun chhung kha belhkhawmin darkar 249 leh minute 40 a tling.
Tui an pump theih loh chhan hi a nut vang a ni a, pump chi loh leh tihfim rual loh khawpa a nut avanga pump lo an ni.
Darkar 250 vel an pump theih loh avang hian thla khat chhunga tui pump chhuah tur zata ngaih pawh litre maktaduai 95.04-in an pha lo.
Tun hnaiah pawh, August ni 13 tukah khan a nut avangin Phase I bikah tui an pump thei lo leh. Phase II-ah erawh an pump thei, Phase I-ah hian Tlawng tui chauh an la a, Phase II-ah chuan Tlawng tui bakah Serlui tui an la. Chuvangin Tlawng a nut viau pawhin Phase II-ah Serlui tui an la thei thin.
Tui fim lam tehna NTU (Nephelometric Turbidity unit) lamah Tlawng lui nutzia a lang thin a, PHE department-in a tehna khawl an hman thinah chuan NTU 1000 thleng a teh thei; NTU 1000 chuang, a tehna khawl pawhin a teh phak loh khawp a ni ngun ta hle. Tun hnaiah a tehna khawl thar, NTU 1000 chuang thlenga teh theihna an nei thar a, August ni 13 tuk khan Tlawng lui tui hi NTU 1100 chuang a ni.
Tui hi NTU 5 leh a hnuai lam a nihin mipui hnena sem tlak a ni a, NTU 5 aia a nut pawhin an pump hnuah an tifim mai thin. NTU 1000 bawr te hi chu pump luihin khawlin a tuar a, a tihfim a hautak bakah tihfim rual loh khawp a ni thin.
Tui pump lo rei, pump chhuah zat pawh tlem
