Khawhai Playground Field-a neih Tuichangral Games 2026 chu Nilaini khan khar a ni a, a kharna hi MLA Jeje Lalpekhlua’n a hmanpui.
MLA chuan Tuichangral Games atang hian thalai talent nei tha engzat nge haichhuah an nih a, inkhelmi engzat nge chherchhuah an nih tih chu a hlutna siamtu tur a ni tih a sawi a. Tunlai khawvelah sports chu eizawnna atan a hman tlak tawh a, chutihrualin hlawhtling tur chuan talent neih that ringawt a tawk loa, a thawkrim leh taima apiang an thleng sang thin tih a sawi. Nu leh pate pawh an fate infiamna lama talent an nei a nih chuan eizawnna tlaka an hman theihnan mithiam leh coach-te kaihhruaina hnuaih theihtawp chhuahpui turin a chah.
Sports chu damdawi mumlian a ni, tiin, eizawnna atana hmang lo tan pawh hriselna atan bakah midangte nen inpawhna tha siamtu a ni tih a sawi a. Zirna lamah emaw infiamna lamah pawh beidawn chang a awm thin hunah, beidawng mai loa thawkrim zual sauh zawk turin thalaite a chah bawk.
Tuichangral Games and Sports huamchhungah hian khua 33 a awm a. Tun tum hian football-ah mipa team 15 leh hmeichhe team 4 an chhuak a, hmeichhiaah N. Mualcheng an champion a, mipaah Sialhawk an champion. Volleyball-ah mipa team 11 leh hmeichhia team 8 an chhuak a; hmeichhiaah Tualte, mipaah Khawhai an champion. Champion team leh runner up hian sumfai, trophy, medal leh certificate an dawng vek a ni.
Heng bakah hian U-16 tan weightlifting, boxing leh wrestling-ah inel a ni bawk.
Tuichangral Games 2026 khar
