Tuihna siamthar lehna (springshed development) tura thawhdunna thuthlung (MoU) chu Rural Development department leh North East Initiative Development Agency (NEIDA) chuan Thawhlehni khan an ziak. Kumkhat atan a ni a, a tul anga pawhsei theih a ni.
RD minister Prof Lalnilawma hmalakna-in an department-in project a kalpui mek Pradhan Mantri Krishi Synchayee Yojana – Watershed Development Component (WDC-PMKSY 2.0) chu watershed development hna thawk a nih angin, MGNREGS nen tangdunin project-in a tuam chin khuaah Tlawng lui fintu tuihnar tihchak thara beihpui thlak nise, tiin, a hmingah ‘Project Tuihna- Dam khawchhuahna’ tih hman a ni.
WDC-PMKSY 2.0 hian springshed development lama tawnhriat nei tawh NEIDA a lo thawhpui tawh thin avangin mumal leh awmze nei zawka tuihna siamtharna ruahmanna siam turin department chuan NEIDA hi thawhdunna thuthlung a ziahpui a ni.
MoU ziah hmanpuitu RD minister chuan tuihna kiam nasat tawh zia leh tuihna humhalh kawnga tan lak a tul zia sawiin, 2024 January-ah Tlawng lui chu 171.5 MLD (million litres per day) a nih laiin January 2025 ah chuan 104 MLD a ni a, kan lui tui leh a hnar humhalh a, tuihna tipung zawnga tan lak a tul tih a sawi a ni.
‘Project Tuihna- Dam khawchhuahna’ ah hian Mizorama lui tui, kan ei leh in atana kan hman zawng zawngah hma lak tum a ni a. Hemi atana springshed development hnathawh dan tur ruahmanna, ground survey leh detail technical report chu NEIDA hian a kalpui anga, WDC-PMKSY 2.0 lch MGNREGS tangdunin hna an thawk ang. Department dang pawh tul leh mamawh anga thawhpui tum a ni.
A hmasa ber atan Tlawng lui tinzawn niin, a hnar atanga hrut thla-in Tlawng chawmtu luite leh tuihna siam tharna tur ruahman a ni. District pali – Lunglei, Serchhip, Aizawl leh Mamit huamchhunga khaw 42 zirchian a ni tawh a. A tahtawlin hmundang pawh zirchian zel tum a ni.
Tuihna siam thar kawngah thawhdunna thuthlung ziak
