Mizoram sorkar enkawl tuikhuah 13 a awm a, chung atang chuan kawlphetha MW 26.87 tharchhuah a nih thu power minister R Lalzirliana’n House a hrilh.
Aizawl South I bialtu C Lalsawivunga zawhna chhangin minister hian Mizoramin kawlphetha a tharchhuah zat hi a sawi a, tuikhuah hmanga MW 26.87 tharchhuah a nih thu leh nizung chakna (solar) hmanga Kwp 2.32 tharchhuah a nih thu te a sawi.
Ziaka chhan chi zawhna chhanga minister-in House a hrilh danin, hydel project (tuikhuah) 13 a awm thu leh chung chu kawlphetha MW 38.35 siakchhuah theihna tura chhut a nih thu, 2021-22 khan MW 26.87 tharchhuah a nih thu a sawi. Solar plant panga a awm thu leh Kwp 2350 siakchhuah theihna tur a nih thu, Kwp 2.32 siakchhuah a nih thu te a sawi bawk.
2019 atanga 2023 thlenga sorkar hmalakna chungchanga zawhna chhangin minister chuan Tlawva SHP leh Kawlbem SHP te commission tawh a nih thu te, Tuirini SHP, Tuivawl SHP leh Saiphai SHP atante DPR siam a nih tawh thu te, Ngengrual SHP, Iva SHP, Khawiva-II SHP te, Mat Sekawi leh Kolodyne phase II atan te DPR final mek a nih thu te a sawi a, Mat Sekawi hi MW 70 siakchhuah theihna tur a nih thu leh Kolodyne phase – II hi MW 460 siakchhuah theihna tur a nih thu te a sawi bawk.
Hmun dang atanga kawlphetha leina ba cheng vaibelchhe 53.51 a awm thu leh ba hi rulh tura hmalak mek a nih thu a sawi a, supplier bill ba tlingkhawm Rs 10,68,67,477 a awm thu leh contractor bill ba Rs 14,51,22,168 a awm thu te a sawi bawk.
Mizoramin hydel project a neih a sawite chu- Tuirivang SHP, Tuipang SHP, Khawiva SHP, Maicham-I SHP, Maicham-II SHP, Kau Tlabung SHP, Teirei SHP, Serlui ‘S’ SHP, Tuipui SHP, Lamsial SHP, Serlui ‘B’ SHP, Tlawva SHP leh Kawlbem SHP te a ni a, a lian ber chu Serlui ‘B’ SHP niin, MW 12 siakchhuah theihna tur a ni a, 2021-22 khan MW 11 siakchhuah a ni tih a sawi.
==========
Tuikhuah a\angin kawlphetha MW 26.87 tharchhuak
