Daily Newspaper

Tuikuk awmtir tumna dodalin bandh huaihawt

8

Aizawl, September 23   :  Tripura-a relief camp-a awm mek Tuikuk-te inbenbeltir tumna dodalin September ni 22 khan khan Jampui tlang dunga Zofate leh Kanchanpur Sub Division khaw dangte’n bandh an huaihawt a, an lungawi lohna hi Tripura chief minister hnenah ziakin an thlen bawk.

Mizoram chhuahsana Tripura hmar lama camp-a awm ta Tuikuk-te hi Tripura-ah awm hlentir tum an ni a, an awmna tura Tripura sorkar ruahmanna siam danah lungawi lovin Kanchanpur Sub Division-ah Joint Movement Committee din niin, Jampui-a Mizo Convention pawh hetah hian an tel.

Jampui hi Kanchanpur Sub Division huam chhunga mi a ni a, Mizo hlang awmna khua hi 10 a awm. Chung khuate chuan bandh hi an huaihawt theuh tih thu dawn a ni.

“Kanchanpur Sub Division mipuite kan lungrual a, sorkarin Tuikuk rawn awmtir a tum hi hnam hrang hrangte’n kan duh lo a,” tiin MC treasurer Ngurdinliana chuan The Aizawl Post a hrilh.

“Kan bandh hi kan hlawhtling a, kan sub division chhunga khaw hrang hrangah bandh hi kan huaihawt a. Sorkar hi chawlhkar khat kan nghak ang a, kan kal zel dan tur chu kan ngaihtuah ang,” a ti bawk.

Thawhlehni tlaiah khan Joint Movement Committee hian Kanchanpur SDM kutah Tripura chief minister hnena pek tur memorandum an thehlut a, thuthar lakhawmtute an kawm bawk. Hetah hian MC hruaitu pathum an tel a ni.

Tripura sorkar tum dan chuan Kanchanpur Sub Division huam chhungah Tuikuk chhungkaw 4600 an awm ang a, hmun dangah chhungkaw 600 an awm ang. Kanchanpur mipuite’n hei hi an duh lo a, an huam chhungah chhungkua heti zat an awm chuan a lo awm sate tan harsatna a thleng ang tih an hlau a ni.

Sorkarin camp-a mite inbenbelna tur a ngaihtuah lai hian Kanchanpur Sub Division-ah chhungkaw 1000 awmtir chu an pawm thei ang tih an lo sawi tawh a, tunah chhungkaw 4600 awmtir tum an ni ta hi an pawm thei lo a ni.

“Min tam hneh hi an tum a, Jampui min chhuhsak hi an duh a, chu chu an rilru puthmang a ni,” Ngurdinliana chuan a ti a, Kanchanpur Sub Division hmun dang chu sawi loh, Jampui chhehvelah an aia tam zawk an rawn awm chuan a lo awm sate an chep hle ang tih a rinawm thu a sawi.

Tuna ruahman dan chuan, Jampui-a Mizo khaw hnaih hmun sarihah Tuikuk hi awmtir tum an ni a, hmun li-ah chuan chhungkaw 1000 zel, a dangah chhungkaw 500 te, chhungkaw 300 te an awm ang. Jampui-a Mizo khaw lian ber Vanghmun hi in 250 vel an ni a, chuvangin Tuikuk hian Jampui Mizote an tam hneh hle dawn tihna a ni.

Tuikuk khuate ngei ngei pawhin an bul hnaia awmtir hi an duh lo a, Tuikuk khaw lite chuan an remtih loh thu hi thuneitute hnenah an lo thlen tawh tih thu dawn a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy