Daily Newspaper

Tuikuk leh Chorei inkar alh, Chorei in kang

POST NEWS SERVICE

164

Tripura-a Tuikuk leh Chorei inkar a alh a, July ni 26 khan Chorei in thenkhat a kang. Hliam tuar pawh an awm nual.

Tripura atanga thu dawn danin July ni 26 khan Tuikuk engemaw zatin Chorei nupa an sawisa a, chumi hnu-ah Tuikuk leh Chorei tlangval rual an inpawm chilh bawk. Chorei in engemaw zat chu Tuikuk hian an hal.

Langkaih lui ral, tuna Tripura hnuaia bet taah hian Zofate khua engemaw zat a awm a, Zo hnahthlak Chorei hi Damchera leh a bul Phaikhua-ah an awm. Phaikhua hi Thawhtanni-a thil thlenna ber chu a ni.

Thu dawn danin, Damchera-a rawngbawla awm K Vana Chorei te nupa chu vawkte la turin Kaskau-ah an kal a, khaw luh dawnah Tuikuk mipa rual, 50-70 velin lo tidingin an khawih rawn ta a ni. Mahse an hmelhriatte an rawn lang a, anni zarah a rei hmain an talchhuak thei hlauh. Kaskau hi Mizorama chhuak Tuikuk-te awmna camp pakhat a ni.

An hnek a, an pet a, thingfakin an vaw bawk a, damdawi inah an inentir nghal a, tlai lam thleng kha chuan hliam na tak chu an tuar lo tih thu dawn a ni.

He thil thleng duhawm lo tak hi chi leh chi inkarah a alh zui a, Tuikuk lam an inhawrkhawm a, Chorei lam an inpunkhawm bawk. Tuikuk-te hi Phaikhua-ah an kal a, in an hal bakah nunau kut an thlak bawk.

Phaikhua atanga thu dawn danin, tlai dar 4 vel kha chuan nunauin an sahimna zawngin Phaikhua hi an chhuahsan deuh vek tawh a, mipa-in in an nghak.

Phaikhua hi in 80 vel an ni a, mipa zawng zawng, tleirawl leh paho thlenga an thawkchhuak chungin mi 200 vel bak an ni thei lo. Tuikuk lam hian an tam hneh khawp mai a, Kaskau leh a chhehvela mite nen, mi 500 chuang chu an ni tih thu dawn a ni.

Tlai lam dar 4 vel kha chuan Phaikhuaa in 10 vel chu a kang tawh a, in pakhat chu a neitute nupa kut an thlak tih thu dawn a ni.

Chorei tlangval thenkhat chu damdawi ina kalpui ngaiin an awm a, Tuikuk lamah pawh hliam tuar an awm nia hriat a ni.

Tun hnaiah Phaikhua leh a chhehvelah hian Chorei leh Tuikuk an lo intai tawh a, kar hmasa mai khan Phaikhaw ram vel hi an lo inchuh tawh.

An bialtu SDM, Panisagar SDM kaihhruaiin Tuikuk leh Chorei hi an inberem a, SDM hian Tuikuk-te chu ram chuh tawh lo tura hrilhin, an awmna tur chu sorkarin a pe a, a ram mite ram chuh lo turin a hrilh tih thu dawn a ni. Chutianga mei si a awm hnu chuan July ni 26-ah a alh ta tih thu dawn a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy