Daily Newspaper

Tuipuiralah na takin lir a nghing leh

12

Ningani tlai lam khan Champhai district Tuipuiral lamah na takin lir a nghing leh a, tihchhiat liantham a neih hriat a ni lo a, inhliam emaw thi emaw an awm lo nia thu dawn a ni bawk.

Thudawn danin, lirnghing hi August 27 tlai dar 5.38 a ni a, a nat zawng hi 5.3 magnitude vel nia sawi a ni a, a nghing rei lo thung. Hemi hnu hian zan dar 7.30 hmalamah tum thum dang vel a nghing zui leh nia sawi a ni.

Hriat theih chinah Samthang khuaah chuan in thenkhat tihchhiat a nei a, in bang brick rem chim te, plywood bang che te a awm a. Metal road chin leh lei tak inrina lai khi a awm nual bawk. Vaphaiah pawh kawngpui khi, a thenlai tlahniam deuh te a awm a ni. In ban khi sa, tunah chhe mai lo mah se, a chet nawn fo chuan ngaihtuah awm deuh nia ngaihte a awm bawk.

Tuipuiral lamah hian kumin June 22 khan 5.8 magnitude-a na in zing dar 4.11 velah lirnghing a awm a, hemi hnu hian, nimin lama a nghin leh thleng hian vawi 100 vel a nghing tawh a ni. August 14-a a nghin hnu ah kar hnih dawn thawm a nei loa, August 27 tlaiah a rawn che leh ta a ni.

Helai bialah hian lirnghing avangin mipui an thlabar a, mahni inah pawh riak ngam loin hmun zawl rem laiah puan in leh rap in te siamchawpin mi engemawzat an riakchhuak thin a. Tunhnaiah lirnghing hi a reh tak deuh avang leh Covid hrileng laka himna atante mahni in lamah an riaklut leh tawh mek niin thudawnna chuan a sawi a. Hetianga a chet leh takah chuan riakchhuak hi engemawzat awm leh tura ngaih a ni tih thudawnna chuan a sawi.

Hetihlai hian Mizoram sawrkarin Mizoram khawchhak lama lir nghing fo mai hi uluk zawka zirchiang tur leh hmanraw tha zawk nena enfiah sak tura sawkar laipui a ngenna chu tun thlengin tihhlawhtlin a la ni lo nia hriat a nih thu dawn a ni bawk.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy