Tuirial bawlhhlawh sawngbawlna hmunah tul loa sum kalral a tam – ZPM ex-corporator

Tuirial bawlhhlawh sawngbawlna
hmunah tul loa sum kalral a tam
– ZPM ex-corporator
Tuiriala bawlhhlawh sawngbawlna hmun – Solid Waste Management Centre ah tul loa sum khawhralna a tam tih ZPM corporator kalchhuak ta te chuan an sawi.
Corporator hlui Malsawmzuala Ralte sawi danin, SIPMIU-in 2022 January 20 khan Solid Waste Management Centre (SWMC) hi AMC kutah a hlan a, a hlan zingah hian bawlhhlawh recycle theih loh ho paihna tur – sanitary landfill a tel. He landfill siamna atan hian SIPMIU-in Rs. 13,32,96,431.00 a seng. AMC kuta a hlan khan DPR angin December 2019-a siam zawh tawh a ni a, operation & maintenance hna January 2020 atanga January 2022 thleng SIPMIU leh AMC technical staff-ten thawk hoin an enkawl.
Sanitary landfill cell khat hi kum 5 chhung hman theih tura siam a ni a, siam zawh a nih hnuah hman lohin kum 5 awm pawh nise, kangmei, khuarel chhiatna tih lohah enkawl dan tur dik taka enkawl a nih chuan chhe lo tura a ngaih a ni tih a sawi a ni.
Hei hi thil awm dan a nih laiin, hman tan a nih hmain a chhaka sih pahnih awm atanga tui putin landfill bang a ti min a, chu chuan HDPE liner a tichhe nual a, landfill chhuat a nih tur ang a nih tir thei loa, a chhuat leh a bang siamthat a ngai a ni. MNF AMC sawrkar chuan cheng vaibelchhe 4.92 sengin a khawih zui a. UD&PA directorate hnuaiah a hna hi AMC-in departmental work-in thawkin tender chhuah a ni lo. 2024 January 21 atangin hna tan a ni a, 2024 March-a zawh tura tih niin, kumin February khan hman tan a ni, tiin a sawi bawk.
SIPMIU-in Rs. 13,32,96,431 senga a siam zawh hnuah, AMC-in vbch. 4.92 sengin a siam leh a, a vaiin Rs. 18,24,96,431 sen a ni ta a, tul vak loa sum tam tak hmanralna nia a lan thu Malsawmzuala Ralte hian a sawi a ni.
ZPM corporator hlui sawi dan bawkin, SWMC-ah hian nitin Aizawl khawpui bawlhhlawh trip 100 chuang paih thin niin, a hmunhmain a zo loa, a thawktuten an thliar seng lo. Chumi tiziaawm turin MNF AMC sawrkar chuan bawlhhlawh halralna khawl – incinerator supply order 2022 September 7 khan a tichhuak a. Khawl supply tur hian Aegis Smart Logix India Pvt. Ltd Hyderabad thlan an ni a. He order lehkhaa a lan danin, dual chamber incinerator, 10 ton capacity, semi automatic, Rs. 2,60,78,000 man a ni.
Kum 2023 ah hman turin an la commission loa, 2024 a ral a, 2025 a ral leh pawhin commission a la ni ta lo tih a sawi. “A supply-tute hi vawi tam phone-in ka bia a, min hrilh danin he khawl hian ni khat (darkar 24) chhungin bawlhhlawh ton 10 a halral thei. ZPM corporator-te a hmunah kan zuk kal a, a thawktute kan zawh chianin, a supply tute sawi dan nen a inang ta lo. Ni khatah quintal 5/6 vel a halral thei hram a, chu pawh a kar lakah a khawl a sat nasat thin avangin chawlhtir zeuh zeuh a ngai, tiin min lo hrilh,” a ti.
Supply order a chhuah atanga kum 3 leh a chanve a liam hnuah pawh hman tura hawn a la ni lo hian thil fel tawk lo a awm ngei tih a tih lan thu sawiin, “Kar hmasa mai khan a supply tute ka be leh a, an tanna ngaiah an la tang. Tuiriala a enkawltute ka be leh a, hman theih loha a awm mek thu min lo hrilh bawk. Vbch. 2.6 senga an lei, MNF corporator thenkhat ten Hyderabad-a zina an zuk enfel vek hnua lei a ni naa, a hmantlak mumal dawn lo a nih hmel hle. A suppy tute sawi anga ni khata bawlhhlawh ton 10 halral thei ni tak tak se chuan, Tuiriala bawlhhlawh sawngbawl loh, in tiat tiata awm nghek nghuk khu a kam duak thei tura ngaih a ni,” a ti.