Tuivai lei dawh zo, la hmang rih lo
2024 March 13 atang dawh tan Tuivai lei chu kumin February 1 khan dawh zawh a ni.
Bailey bridge feet 200-a sei, Mizoram leh Manipur inkalpawhna) hi Inrinni khan lirthei tan tlan theih a ni em tih enchhin a ni a, PWD hotute chuan Tuisual Group YMA hruaitute chu a hmuna enpui turin an sawm. A hmunah hian Group YMA president Lalremsanga Biate hoin hruaitu dang bakah Sinlung Hills Council executive member Lalhriatchhunga Hmar leh Sakawrdai Vilage Council lam pawh an tel a ni.
Lei hi lirthei rit phur zawh atan a rinawm tawk em, tih enchhin a ni a; truck lian (Hyva) hman a ni. Hyva hi a ruaka tlantir phawt a ni a, a laiah an dintir a, lei hian a zo tha em tih enchhin phawt a ni. Hemi hnu hian Hyva phurh theih tawk chanvea rit phurhtir a ni leh a, hlawhtling taka enchhin leh a ni. A tawpna ber enchhinnaah Hyva hian a phurh theih china rit (tiau/chips) a phur a, lei hi a zawhpui leh a. Hei pawh hi hlawhtling taka enchhin a ni. Lei hi ton 20 aia rit zawhpui loh tur a ni a, PWD chuan hei hi zawm vek turin mipui an ngen lawk a ni.
Lei hi dawh zawh ni tawh mah se, mipui hman theiha hawn a la ni lo a. A chhan chu, Mizoram leh Manipur lam, lei bulthut kawng hi siamthat a la ni lo. Manipur lam chu tunah hian siam mek a ni a, Mizoram lam hi tunkar chhoa hna tan tum a ni.
Thudawn danin sawrkar chuan kumin Budet Session, February 19-a neih tan hma ngeiin hawn hman an inbeisei tih sawi a ni a. Chief minister hawntir tum niin, official-a hawn hma chu PWD hian zawh an la remti lo nia sawi a ni.
Tuivai lei dawh zo, la hmang rih lo
