Tum nei sa in Lok Ayukta chairman ruat tum an ang
– Lalduhoma
MNF sawrkarin Lok Ayukta chairman ruatna a kalpui tum dan chu tum nei lawk sa ang a tih thu ZPM leader Lalduhoma chuan a sawi.
Zo Legislature Party leader Lalduhoma hian thuchah siamin, sawrkar thuhnuaia awm loa lai taka rorel thei tur nihna sang tak tak, heng – MPSC chairman leh secretary tur, Lok Ayukta chairman leh secretary tur leh chief information commission leh a member ruattu tur bik Selection Committee din thinah sawrkar dinglaiin an mi duhzawng leh an sangawizawnpui theih tur mihring an dah mai mai lohna turin Committee-ah hian opposition leader chu a tel ve ngei tur a ni tih danin a phut thu a sawi a.
Opposition leader an awm loh pawhin ‘Principle of Natural Justice’ kenkawh a nih theih nan Legislative Assembly-a group lian ber leader chu he Committee-ah hian telh a ni mai thin tih sawiin, Pu Hawla chief minister lai pawhin group leader a nihna angin amah chu an telh thin thu te, Pu Zorama CM a nih nawn hnu chuan Lok Ayukta chairman ruatna turah an telh ve duh tak loh thu te a sawi.
Selection Committee-ah hian chairman-ah CM niin, Assembly speaker leh Gauhati High Court judge-te member an ni tih a sawi a ni.
“2019 February 8 leh 9 khan meeting pangngai pawh ko loin video conferencing hmangin an meeting a. Chutah chuan opposition leader hi Selection Committee-ah hian telh ve kher a tul lo e, tiin thutlukna an siam a; chuta tang chuan ka tel ve ta lo a ni. Amaherawhchu, a hnu lama Selection Committee awm lehah chuan min telh leh lawi a. Chief information commissioner atana Pu Lalnunmawia Chuaungo ruat a nih dawn pawh khan min telh a ni,” a ti.
Lok Ayukta chairman ruatna tur bik chauha an telh ve duh lo chu chhan engemaw tak a nei tih tunah a lang ta nia sawiin, kumin August 29 khan Selection Committee hi a thu a, chutah chuan MNF party leh sawrkara chanvo lian tak chelh lai mek mi pakhat chu chairman nih tir tumna leh a member atan SP tanglai pension tep tawh, IPS pawh la confer loh chu dah tumna a awm tih hriatchhuah a ni tih a sawi.
“Lok Ayukta chairman term hi nakum March-a tawp chauh tur a ni a. Term a tawp hma hma leh inthlanpui puan a nih tep tawh lai a, hetiang thil an ngaihtuah chhan ber nia lang chu, MNF hian inthlan turah hian sawrkar an inring tawh loa, sawrkar thar hnuaiah thubuai chi hrang hrang nei dawna inngaihna an nei a, chumi hlauthawng chuan chu’ng lak a lo invenlawk nan anmahni humtu tur Lok Ayukta hi tun atanga lo buatsaih duhin an pawngsual ta mai niin a lang,” ZPL leader hian a ti.
Mipuiin corruption do ngam sawrkar huaisen neih an nghakhlel em emnaah, mipui rin ngam Lok Ayukta neih a tul lai a, hetianga mahni sahimna zawn avanga hma lak chu thil pawi tak a ni, tiin, kalpui zui tawh lo turin sawrkar a ngen tih a sawi.
“A thu hrimah, sawrkar hmasa sulhnu chhui a, thubuai lian tak tak inneih tir a, inchhui chiam chiam hi ka mimal duh dan a ni ngai lo a. Sawrkar thar chuan dik tak leh huaisen takin, anmahni hun atangin hma an la mai turah ka ngai. Kan party ngaihdan phei chu ka hre loa, ka mimal ngaihdan chuan sulhnu inchhui chiam chiam hi thil tul ni ah ka hre lo. Kan hun kal tawh chu hun kal tawhin liampui se, sawrkar thar atangin rilru thar puin mitinin insiamthatna hun neiin hma kan la mai tur a ni tih hi ka mimal ngaihdan a ni,” Lalduhoma hian a ti.
ZPM chuan Pathian leh mipui zarah sawrkarna an la a nih pawhin, MNF unaute chu lo hlauthawng lo tur leh thlamuang taka lo awm turin a chah tih a sawi a ni.
Tum nei sa in Lok Ayukta chairman ruat tum an ang – Lalduhoma
