Rev Dr Ramengliana
India ram pawn atanga tanpuina lo lut thin kaihhruaina siamthat tumna (FCRA Amendment 2026) hian tun hnaiah hian India rama Kristiante, a bik takin kohhran hruaitute, rilru a tibuai hle a. Keini ho hriat phak lovah hian thenkhat chuan mawngvawm ba ang maiin an phu nasa hle. Mi thiam leh thuneitute rawn leh a theih ang anga hma la turin an intintuah mek a ni ber mai. Keini ho pawhin kan lo hriat ve a, theih chin chinah kan lo tan thiam ve te pawh a pawimawh awm hle a ni. Mi mal leh pawl te pawhin kan tawngtaina lamah te lo hre lar ila, India rama Kristian zawng zawngin kan inpumkhatna kan tihlan hun pawimawh a thleng a ni ber awm e.
FCRA chu eng nge?
Foreign Contribution (Regulation) Act (FCRA) hi kum 1976 atang daih tawha hman tan a ni a. India ramah hian ram pawn lam atanga tanpuina a rawn lut thin a. A bik takin sakhaw thilah a tam zual hle a ni. Keini Kristian ho phei hi chuan kawng tam takah kan sawtpui hle tih loh rual a ni lo. Kristian hmun pawimawh tam tak – College, University, School, Hospital, hnuchham enkawlna, NGO leh a dang chi hrang hrang hi hemi kal tlang fund hmanga din leh enkawl a ni nasa a. Mi sang tam takin lo chhawrin, rah tha chhiar sen loh a chhuah tawh bawk a ni. He dan hi chutiang sum lo lut thin kaihhruaina dan chu a ni ber awm e.
Chutih laiin kawng tam taka hetiang fund hi hman sual a ni ve tho a. Mi thenkhat chuan sum hai lut a, mahni inchhekarbawm nan te pawh an lo hmang a ni awm e. Sawi tur ting chuan thil a awm ve fo. Sap ram hausakna chawk luha lo intihsiak titih ta mai te pawh an awm bawk a. Report dik lo hman tangkai leh sum lo lut hman dan tur ni lova lo hmang ta mai maite pawh awm theih a ni ve tho. Hetiang thil leh thil dang ril zawk avangin tunlaiah hian sorkar laipui chuan chekngel lehzualin thil a kalpui a ni kan ti thei ang. Chu chu pawl leh mi tam takin an tuar tawha, tunah hian nasa lehzual zawka tuar theihna dinhmunah kan awm mek a ni.
FCRA Amendment 2026
Kumin March 25 khan Union Minister of State for Home Affairs Shri Nityanand Rai chuan Ministry of Home Affairs aiawhin FCRA Amendment rawtna chu a pu lut a, sawi zui a hlawh hat hat hle a ni. Dodaltu pawh an tam hle. Pawl hrang hrang, tangkai tak tak site chungah sorkarin a thuneihna a hmang sual nasa thei dawn hlein an hria a, sawisel pawh a hlawh nasa viau. He dan siam that an rawt hi tunah chuan an la pass rih lo va, Monsoon Session lo awm turah hin an pass rup mai ang tih hlauhthawnna a lian a, chutiang chu a thlen loh nan tan ho a pawimawh ta a ni ber awm e.
FCRA Amendment 2026 -ah hian thil duhawm lo zual tak mai an zeh tel tak tlat hi rilru thawng nasa chu a ni a. Rawtnaah hian FCRA cancel sakte leh tihtawpsak te chu ram dang tanpuina hmanga din hmun leh hmate chu sorkarin a laksak thei ang, tih hi a tel ta tlat mai a. Hei hi ngaihtuahna tithui ber chu a ni ta. Tuna hman mek 2010 amendment (siam that) -ah hi chuan foreign fund lo lut ang ang hman dan an en dik a ni ber a. Dan hi siam that a nih vaih chuan Kohhran leh NGO tam takin an thil neih an chan nasa thei dawn hle tihna te pawh a ni thei awm e. Sap ram tanpuina avang liau liaua din leh enkawl hi a lo tam ve tawh si a.
June 28-ah ram pum tawngtai rual
Naktuk June 28 hian India ram pumpuia Kristiante chuan he dan thar hi an pass loh nana tawngtai rual an rawt ta rup mai. Keini lamah hi chuan kohhran hrang hrangteah hian a tla na lutuk lo a ni mai thei e. FCRA hian min tihbuai lutuk loh hlawm vang pawh a ni thei ang. Amaherawhchu, he thil hian Kristian rawngbawlna nasa takin a tithuanawp thei tih hria ila, chu mai bakah tul lo deuhva buaina hnawk takah kai lut nekin tha leh zung tam tak a sentir thei bawk a ni. Chuvangin, kohhran pawl anga program bikte an siam lo a nih pawhin hemi niah hian mi mal emaw, chhungkua angin emaw tawngtainain kan Kristianpuite hi lo zawm ve turin kan inngen a ni.
Heti taka sorkar a fet ta hi Kristiante chhungkuaa inenfiahna hun pawimawh taka hman tangkai theih pawh a ni. Felna leh dikna chu Kohhrante leh rawngbawlna zawng zawng hian a ken kawh tur a ni a. Chumi atana dan hi a awm a nih chuan lawm hle zawk tur a ni ang. Chutih rualin sakhaw thila inrah beh tumna leh Kristian rawngbawlna tihthuanawpna hmanraw tangkai tak hetiang dante hi a ni thei a. Mi tam tak chuan chutiang chuan an hmu niin a lang bawk a ni. India ram pawna zawmpui neite hnawksak tihna a lian deuh te pawh a ni tel thei bawk a. Thenkhat ngaihdan chuan thil nihphung hi a lang chiang thawkhat viau a nih hi.
Ram leh sakhua inzawm?
Mi tam zawk chuan mahni ram leh hnam tana rinawmna leh sakhaw mal hi inzawmna nei bik angin kan ngai lem lo tawp ang. India mi chu Hindu, Muslim, Kristian, tu pawh a ni thei vek a. India ram mi nihna leh a sakhaw biak kan thlun zawm lui kherin a rinawm loh a ni. Thil theih pawh va ni suh! Amaherawhchu, tunlai khawvela India rama mi tam tak hian India mi nihna leh Hindu sakhua chu an thlun zawm lui tlat a. Sakhaw dang hnawksak tihna pawh a lian hle niin a lang. Ram a zauh zel phei chu hlau tak an ni. India ram leh hnamin chhiat phah turah an ngai! Hnam politics atanga sakhaw enna tarmit an vuah a ni ngei ang. Nationalism leh sakhua kaihkawpna thil hi chu kan tuar zual zel dawn niin a lang.
Keini erawh chuan chutiangin kan en thiam ve hauh lo va. India ram hi sakhaw zalenna ram – mi tupawhin a sakhua a biak a, a thuchah a hril a, rawng a bawl theihna ram zalen, niin kan pawm tlat a. Chu chu India Constitution-a kan hmuh dan pawh a ni ngei a. Tunlai khawvelah ram leh hnam nihna leh sakhaw biak sawi zawm a, inngai ‘original’ deuh leh thenkhat ‘foreign’ deuha ngaite pawh an lo chak ta viau mai. Chutiang politics thlirna atang chuan keini Kristiante leh kan rawngbawlna ngeite pawh hi a lo hnawksak thei ta viau mai ni tur a nia. Eng pawh ni se, beramno anga pawisawi leh rul anga finga awm turin i han tawngtai sauh sauh teh ang u. Thlarau thil hi tisa chaknaa hmeh mih tumna a lian mek chu a ni si a.