Tun hnaiah meth man belh nasa

Tun hnaiah Mizoramah ruihhlo hlauhawm meth
amphetamine an man nasa a, thla liam ta ringawt pawh khan man tur hi a pung nasa.
‘Meth’ tia sawi methamphetamine hi Mizoram Excise & Narcotics (MEN) department-in October thlaah khan kg 32.103 lai an man a, kum danga an man zat leh kumin thla danga an man zatte nena khaikhinin, kumin October thlaa an man hi tam tham tak a ni!
MEN department chhinchhiahna enin, May thla thleng khan meth hi kg 4.056 an man a, June atangin nasa takin a pung ta a ni.
June leh July thlaa an man kha kg 28.877 a ni a, August-ah kg 9.782 an man belh leh. September-ah kg 4 an man a, October-ah kg 32.103 lawih an man belh.
October thleng khan MEN department hian meth hi kg 78.818 an man a, chung zinga kg 74.762 chu June thla hnu lama an man a ni.
Meth hian Mizo thalaite a la tibuai lovah ngaih a ni a, mahse man tur hi a awm ve deuh reng. MEN department hotute chuan Mizoram hi a kalkawng a ni an ti.
An sawi danin, khawchhak lam atangin Mizoramah an lalut a, Mizorama lakluh hi ram pawn hmun hrang hranga mi tur a ni thin. A neitute pawh hi hnam dang an ni tlangpui.
Nikum khan meth hi kg 115.007 an man a, kumin thla 10 chhunga an man hi nikum kum tluana an man zat nena khaikhinin a tam han tih tur ni lo mah se tun hnaia an man zat erawh hi chu a tam.