Tun hnaiah raltlan sang chuang lut thar

Tun hnaiah Myanmar atangin Mizoramah a hlawmin raltlan an lut leh a, sorkarin a chhinchhiah chinah sang an chuang tawh.
Tun hnaia a hlawma Mizorama lut tharte hi Champhai district-a lut an ni a, Champhai district hotute’n an chhinchhiah chin pawh mi 1013 an ni tawh.
Champhai bawrhsap James Lalrinchhana’n The Aizawl Post a hrilh danin, an chhinchhiah chinah Vaikhawtlangah raltlan lut thar hi mi 606 an ni a, Khuangphah-ah mi 197, Hnahlanah mi 178, Vapar-ah mi 32 an ni.
An hriat danin May ni 17 velah khan an ralmuang lo thar a, inkap an awm avangin Myanmar-a khaw pasarih vel atangin Mizoramah mipui an tlanchhia a ni.
“Chhungte nei te, thian nei te an ni a, belh tur an neih ang ang an bel a. A then chu hall remchangah an awm bawk a, khawtlang hruaitute’n an lo buaipui a,” Champhai bawrhsap chuan a ti a, May ni 17 velah inkap an awm a, chumi hnuah chuan Mizoram panin mipui an tlanchhia tih chu an hriat dan a nih thu a sawi.
Sorkar-in a la chhinchhiah loh pawh an awm nia hriat a ni a, Champhai district khaw thenkhat, Mimbung, Teikhang, Ngopa leh Kawlbem velah pawh raltlan lut thar hi an awm nia hriat a ni.
Tun hnaiah Myanmar-a Zo hnahthlak pawl pahnih ZRA leh CNA te kar a tha lo a, pawl pahnih an inkah avangin raltlan a hlawma lut thar hi an awm leh a ni.
Thu dawn danin, tuna raltlan tharte hi a hma zawnga ralmuang an ni a, kum hmasa lama Myanmar atanga Mizorama raltlan an awm lai pawha tlanchhe ve lo khua zel an ni.